PENGAYA ASAL: Entara main asal (tanda Bidayuh Jagoi-Bratak) ke suah dipandang maya Hari Bung Bratak ba taun ke udah.
Pemutus ngetuka pengerami nya ba taun 2014 enggau 2015 ngambi meri awak palan nya dikemanah
KUCHING: Hari Bung Bratak ke diintu tiap 1 Mei ninting taun ba punjung bukit ti urung 1,000 kaki peninggi ari paras ai tasik disadang diketu ba dua taun tu.
Pemutus pengerami nya enda diintu ba taun 2014 enggau 2015 ketegal Palan Pesaka Bung Bratak nya deka dikemanah enda lama agi nengah agih belanja RM8 juta ari Opis Menteri Dagang Temuai enggau Pesaka (Perintah Besai).
Chairman Serakup Pesaka Bung Bratak Dato Peter Minos madah Opis Kereja Raya (JKR) Sarawak diberi tanggung pengawa bejalaika pengawa ngemanah palan nya.
Tembu pengawa ngemanah ba taun 2016, pengerami Hari Bung Bratak deka diintu dia baru.
Berindik ari nya, Serakup Pesaka Bung Bratak ke ngintu pemaik Bung Bratak meri jaku puji ngagai perintah lebih agi Opis Menteri Dagang Temuai enggau Pesaka,”ku iya.
Bejaku ngenang palan nya, Iya madah pengawa ngemanah ngelaika basa ngagai Bung Bratak ke udah nyadi tembawai lama 33 iti genturung pendiau ngelingi Bau sereta Lundu ari raban bansa Jagoi-Bratak (Bidayuh).
Mandangka pemanah ukir, main enggau pendiau asal Bidayuh, iya madah palan nya ila deka ngembuan 2 buah rumah panjai, sebuah ulih endur 100 iku orang diau lalu sebuah agi endur orang begempuru ngadu licha, muzium mit enggau opis.
Palan nya mega deka disikap enggau sebuah ‘baruk’ ke besai, sebuah kantin enggau 2 buah bilik endur ngenatka diri. Dua bengkah ai terejun di Bung Bratak ti nyendiakka bekal ai beresi deka diangkat nyadi palan pematak temuai.
Palan Pesaka Bung Bratak disadang ulih matak mayuh temuai baik nya ari dalam tauka luar datai ketegal ti ngembuan rampa menua ke chukup manah,” ku iya.
Iya mega madah, ninting taun Hari Bung Bratak nerima timbal ke manah ari mensia mayuh ke bela keran nemu sejarah enggau pesaka ke dikembuan.
Sejarah Bung Bratak ditusui penulis bansa Belanda enggau British ba abad ke-19.
Ketegal nya, palan udah nyadi sebengkah pekara ti dikemegah bansa Bidayuh lebih agi raban Jagoi-Bratak, ke nyadi palan sejarah enggau pesaka ti unik sereta tau matak raban temuai kitu,”ku iya.