KUCHING: Nembiak menua tu dikearapka ulih nyadi ketuai nyerakup, ngenegapka sereta ngangkatka menua ngambi tampak sereta dipebasaka dunya.
“Tu mega deka nyadi penyelai sereta penegap ti nyadi ke lalau ngambika menua kitai maju. Ukai semina maju aja tang likun sereta beserakup. kitai mega ulih diau enggau likun, lantang, besaupka pangan diri, siru sereta nyadi rayat 1Malaysia ke beserakup,” pia ku iya.
Menteri Kerja Raya, Datuk Fadillah Yusof bejaku munyi tu lebuh ke nutup Karnival Mesra Belia Malaysia (Jom Putrajaya) 2014, ti diatur Opis Menteri Nembiak, Lumba enggau Main (KBS) ba Kompleks Nembiak, Lumba enggau Main di Jalai Tun Ahmad Zaidi Adruce ditu, kemari.
“Program Karnival Nembiak 1Malaysia diatur, diperambu sereta dipejalaika bala nembiak nitihka peneka ati nembiak empu.
“Tu meh ti dikedeka kami ngambika nembiak ti bejalaika program ulih ngatur program ti nguntungka bala nembiak empu, laban sida meh ti dikearap ngemansangka menua jemah ila,” pia ku iya.
Ku iya, enti nembiak ngembuan penemu, pengelandik enggau pemanah ulah, menua tu ulih nyingkang nyadi menua ke maju.
Tu meh program besai ke bekaul enggau nembiak kedua kali udah diatur. Keterubah endar sebedau tu diatur dalam taun 2012 ba Putrajaya, ke dikumbai ‘Himpunan Jutaan Belia di Putrajaya 2012’, ke alai udah ngempuruka urung 2 juta iku nembiak ari serata menua Malaysia di Putrajaya.
Di Sarawak, program tu udah diatur ba tikas parlimen enggau tikas nengeri lalu ke penudi endar ditutup ba Putrajaya, pia ku iya.
Entara program ke bisi dipejalaika kemari baka pemandang, pemerindang, bejualka barang, pekit Muaythai, lumba enggau main sereta mayuh macham agi main bukai.
Bela bisi ngulu program tu, Sapit Direktor Kompleks Nembiak, Lumba enggau Main Muazamir Jili, Direktor Kaunsil Ijinsi Latih Betanam Betupi (NATC) Wan Ahmad Uzir Wan Sulaiman, enggau Direktor KBS Abd Haris Ishak.