KUCHING: Sebansa engkatak lumur dua mit di dunya bisi ayan di Taman Negara Kubah, Matang ke mega palan pengidup spisis engkatak enggau raung bukai.
Sebedau tu, engkatak ke pemadu mit kala ditemu ba taman tu nyentuk ke raban saintis tetemuka engkatak bukai ti mit agi ba taman bukai.
Nyadi palan pengidup engkatak sereta raung, kitai enda alit ati kebuah Taman Negara Kubah dipilih endur ngatur ‘Borneo Frog Race’ ti ke-enam kali.
Diatur Universiti Malaysia Sarawak (UNIMAS), Borneo Frog Race dipungkal beserimbai enggau Hari Ngintu Engkatak tauka Save the Frogs Day.
Nitih penerang ari CEO Sarawak Forestry Corporation (SFC) Datu Ali Yusop, kelimpah ari pemanah utai tumbuh enggau utai idup, Taman Negara Kubah mega nyadi Palan Pengidup Jelu Siga Matang.
Palan Pengidup Jelu Siga Matang entara siti palan pemadu likun endur ngintu jelu siga ti nyauka punas tauka palan endur ngintu jelu ti diserah mensia mayuh.
“Palan Pengidup Jelu Siga Matang mega diangkat nyadi palan endur bejalaika pengawa pemansik, palan endur belajar lalu nyadi palan endur ngintu jelu siga ti nyauka punas di Sarawak.
“Jelu siga ba palan tu deka diintu enggau manah sebedau dilepas ngidupka diri ba dalam kampung.
“Taman Negara Kubah udah digizit ba taun 1989 lalu bisi ngintu lebih 80 spisis palma ti ngujungka palan tu nerima gelar Dunya Palma,” ku iya lebuh bejadika pengawa Nutup Minggu Kubah ensana.
Bejaku ngenang Minggu Kubah, iya madah, pengawa nya nyadi pengeran SFC ti deka ngelaku pemereti senentang pengaya utai tumbuh enggau utai tumbuh di Taman Negara.
Entara pengawa ti bisi ditusun rambau Minggu Kubah iya nya Borneo Frog Race, Vallombrosa Walk, Kubah Guided Walks, pengawa beripai, pekit fotografi sereta sekeda ke bukai.
Minggu Kubah diatur SFC begulai enggau Opis Menteri Dagang Temuai, Serakup Dagang Temuai Sarawak, Opis Residen Kuching enggau UNIMAS.
Bela bisi ngulu atur pengawa nya, CEO STB Datu Rashid Khan, Direktor Institut Pengintu Rampa Menua enggau Biodiversiti UNIMAS Prof Dr Andrew Alex Tuen sereta Sapit Menijar Besai SFC Oswald Braken Tisen.