KUCHING: Laya politik sereta penyarut ari dalam parti patut diseliah rambau kitai ngintu Gawai Dayak, Ku Menteri Pemansang Rama Tan Sri William Mawan Ikom.
Mawan ke mega Menteri Kanan dalam kabinet menteri nengeri madah ba dunya kemaya hari, pengerami gawai ngelaika pengawa kitai ngintu pemujur ti udah ditempa lalu ngambika tiap iku kitai ulih nyapai pemujur ke besai agi jemah.
Iya ngelalau dia Hari Gawai patut endur kitai ngerapitka kaul sereta ngenegap penyerakup enggau pangan diri.
“Manah agi kitai enda bejaku ka pekara politik lalu berami maya Hari Gawai. Gawai sebengkah pengawa ti mai penyerakup lalu anang ngerusak pengerami tu enggau jaku politik,” ku Mawan lebuh dikerandau The Borneo Post.
Mawan madah iya deka ngintu gawai ba Pakan kenaka 1 Jun lalu semua dikangau datai berami.
Kena 2 Jun, Mawan deka ngulu Pengerami Gawai Dayak (renggat nengeri) di Dataran Kipas, Miri.
Pengabang dipebasa ke disadang datai iya nya TYT Tun Pehin Sri Abdul Taib Mahmud enggau bini, Toh Puan Ragad Kurdi, Menteri Besai Datuk Seri Najib Tun Razak enggau bini Datuk Amar Rosmah Mansor, Kepala Menteri Tan Sri Datuk Amar Adenan Satem enggau bini Puan Sri Jamilah Anu sereta Sapit Kepala Menteri Datuk Patinggi Tan Sri Alfred Jabu Numpang enggau bini, Dato Sri Empiang.