Wong diatu betapi enggau penyakit riman untak kenyau bulan Januari taun nyin kemari
Dikarang Rengenyan Labang //
KUCHING: Bala Wong Ho Leng sebilik iya nya seiku tuai politik ke kala nyadi Chairman DAP Sarawak temegah ati sereta beterima kasih ngagai Perintah Nengeri laban udah meri bantu sepenyampau RM1 juta dikena melanja ungkus perubat Wong, kemari.
Bantu belanja nya disuaka Speaker Kunsil Nengeri Datuk Amar Mohamad Asfia Awang Nasar ti ngarika Perintah Pengeri ngagai bini Wong, Irene Mary Chang.
Irene muji Perintah Nengeri laban tetap meri bantu kelebih agi ngagai Wong ti nyadi Kaban Kunsil Nengeri (ADUN) Bukit Assek taja pan bebida kuing politik.
“Kami sebilik beterima kasih ngagai Perintah Nengeri, Kepala Menteri Tan Sri Datuk Amar Adenan Satem sereta rayat Sarawak ti udah nyukung enggau meri bantu ngagai kami lebih agi ngagai Wong.
“Ba penemu aku tu pekara ti amat jarang nyadi, kebuah pia laban tu meh keterubah utai tu diatur lalu Sarawak ulih nyadi chunto iya nya senentang perintah mantu kaban politik ari parti penyakal.
“Tu pekara ti amat manah sereta endang patut ditemegahka sereta aku ngarapka pengawa ti manah tu ulih diteruska jemah ila, sama mantu pangan diri lalu anang ngira bida politik,” ku Irene.
Iya mansutka pekara nya lebuh dikerandau pengarang berita pengudah atur pengawa nyuaka bantu RM1 juta ari Perintah Nengeri ngagai Wong, diatur ba Opis Kunsil Nengeri ditu, pagi kemari.
Berebak enggau tu, lebuh ditanya bekaul enggau gaya pengerai Wong, Irene madahka Wong benung bebendar ngelaban penyakit ti nuntung iya.
“Naka ke diatu aku ulih madahka gaya iya amat manah, iya agi ulih ngelaban (penyakit).
“Diatu ia benung diperubat ba Pusat Perubatan Rejang di Sibu,” ku Irene ti disempulang anak iya Julie Wong enggau Gabriel Wong Soon Seng, kemari.
Wong ti kala nyadi Kaban Parlimen Sibu betapi enggau penyakit riman untak kenyau bulan Januari taun nyin kemari pengudah pakar bebuntas neurologi di Australia tetemuka sel stem glioma ba untak iya.