KUCHING: Opis Menteri Pengawa Berumah deka ngaga mayuh agi apartmen dikena mutar penyuntuk rumah seraya ngemantupka peneka nembiak rebak baru.
Berindik ari nya, perintah merambu deka ngaga mayuh agi apartmen dalam kandang mengeri ti tau mega ngemujurka pemaik institusyen ruang bilik.
Menteri nya, Datuk Amar Abang Johari Tun Abang Openg madah pemutus nya digaga pengudah tebal agi nembiak rebak baru diatu rindu diau di apartmen.
“Nembiak rebak baru diatu ngasaika diau di apartmen setipak enggau gaya pengidup ti suah bejalai ninggalka rumah baik nya ketegal kereja tauka bejalai ngelantangka ati.
“Sida ngasai, diau di apartmen lebih likun ketegal kandang ngelingi dipagar sereta nadai penanggul enti ditinggal lama.
“Ketegal nya, perintah angkun nyendiakka apartmen ungkup nembiak rebak baru lebih agi ngagai sida ke baru nirika ruang bilik,” ku iya ba pengerami ngintu Hari Apai di The Hills ditu, kemari.
Iya ke mega Menteri Dagang Temuai netapka tiga genturung pendiau iya nya Kampung Tabuan Melayu, Darul Hana enggau Kampung Tanjung Datu di Sibu entara sekeda palan endur ngaga apartmen.
Kelimpah disedia ungkup raban nembiak baru, Abang Johari madah apartmen mega manah dibeli raban orang ari menua pesisir ke mindah ngagai kandang mengeri.
“Raban orang ari menua pesisir ke gawa dalam kandang mengeri tau meli apartmen ke alai sekeda nya dijual ba rega ke umbas iya dibayar sida.
“Perintah enggai nyadi enda berundingka sida, ngintu pemaik ruang bilik sida. Diatu rega rumah nyau majak mar ketegal rega tanah ti udah majak niki lalu pemutus nirika apartmen ulih mutarka sekeda penanggul tu,”ku iya.