Diatu nadai bida agi dalam komuniti bumiputera
Dikarang Jacqueline David //
BAU: Politik pemansang ti digaga perintah dalam kandang 50 taun diperatika ulih ngubah pendiau rayat sereta ngubah menua tu nyadi menua moden.
Tuai Pemegai Menua (TYT) Nengeri Sarawak Tun Pehin Sri Abdul Taib Mahmud madah, asil ari nya, semua pupu bansa di menua tu sama ngasaika mayuh macham pemansang ke udah ngubah pendiau sida maju agi.
Iya madah, perintah udah bebendar beratika pengelantang pendiau rayat menua tu lantang agi sereta ngasaika pemansang baka ke diasaika mensia mayuh kemaya hari tu.
“Kemaya hari tu, tau dipadah kitai, nadai sebengkah bansa kena tinggal, enda ngira nya orang Bidayuh, Iban, Melayu, China tauka Orang Ulu.
“Semua pemisi kitai diatu ba mua mata kitai empu lalu semina bepanggai ba kitai empu laban semua rayat bisi kuasa diau lantang sereta bulih pengawa ke manah.
“Aku beratika, diatu nadai bida agi dalam komuniti bumiputera laban semua pupu bansa udah niki ngagai seiti tikas lalu ngulihka penguntung asil ari pemansang ke digaga perintah,” ku iya.
Taib madah munyi nya rambau Pengerami Rumah Tebuka Gawai Bung Konis 2014 di Bung Konis, Singai semak ditu, kemari.
Kelimpah ari nya, iya ngarapka bansa Bidayuh sereta semua pupu bansa bukai di menua tu tetap beserakup lalu sama-sama ngaga menua tu nyadi menua ke maju. Ba jaku iya mega, iya muji orang dagang Bidayuh ke udah mujur baka Henry Harry Jinep enggau sida sebilik ke bukai laban ke udah ngatur pengawa nya lalu iya ngarapka sida sebilik terus maju lalu nyadi chunto ngagai semua komunti Bidayuh.