Dikarang Churchill Edward //
Pengerami Gawai mega patut ke pelasar endur semua peranak nengeri tu ngenukuka pengelikun menua diri
BETUAH AMAT: Mawan (tiga ari kanan) nyuaka injin rumput ngagai seiku pemenang tikit benasit Sidek Mersi seraya dikemataka Ali (kanan), Hamzah (kiba) sereta temuai bukai.
KUCHING: Tuai Pengabang pengawa Ngiling Tikai PBB N15 Muara Tuang, Tan Sri William Mawan Ikom madah, pengerami Gawai Dayak ukai semina endur kita gaga besampika pengulih pengawa bumai sepemanjai taun ke udah tang mega patut nyadi pelasar semua peranak Sarawak, enda milih peturun tauka jalai pengarap, ngenegapka kaul sereta ngemeranka kerejasama kena ngenukuka pengelikun menua.
Mawan ke mega, Menteri Pemansang Rama madah, kelimpah ari pengerami Gawai, bansa Dayak patut ngemeratka pemesai reti adat enggau main asal diri baka ti dibantai malam Hari Minggu nya.
Iya ke mega Kaban Kunsil Nengeri (ADUN) Pakan sereta kaban parlimen (MP) sitak Saratok nerang: “Maya penyarut 13 Mei 1969 di Semenanjung Malaysia suba, peranak nengeri Sarawak enda nemu utai ke nyadi din laban kiruh enggau pengidup diri sereta enda irauka penyadi nya laban bebasaka pangan diri lalu enda muntang dikeruga penemu jai.
Iya mega madahka diri lantang sereta gaga ati meda penegap kaul entara pupu raban bansa di nengeri lebih agi lebuh pengerami Gawai Dayak, Hari Raya Puasa tauka Taun Baru China.
Tuai Gawai ba pengerami nya, Datuk Seri Mohammad Ali Mahmud ke mega ADUN Muara Tuang ngelalau mensia mayuh seruran ngemeratka pemanah kaul sereta kerejasama ngambika tepujurka pemansang ekonomi.
NGINTU PEDARA: Mawan (kanan) enggau Ali (dua ari kanan) bela ngenukuka pengawa Miring ti diketuaika Suja (kiba) maya atur pengawa malam nya.
“Kitai muntang ngemujurka semua juluk sereta atur pemansang enti bisi kerejasama enggau kaul ti tegap lalu nya deka nguntungka semua peranak menua,” ku Ali.
Berebak enggau nya Ali ngelansa penyadi dua macham sejarah di nengeri tu taun tu. Keterubah, ku iya, pengawa maduka Kepala Menteri ke suba Tun Pehin Sri Abdul Taib Mahmud nyadi Tuai Pemegai Menua (TYT) sereta kedua, ngangkatka Menteri Pengawa Spesil Tan Sri Datuk Amar Adenan Satem nyadi Kepala Menteri baru.
Iya nandu, Taib mega MP Kota Samarahan dulu suba lalau Adenan ex-ADUN Muara Tuang.
Ali ke mega chairman PBB N15 Muara Tuang madah, Mawan (ex-presiden SPDP), taja ngubahka kuing politik, iya endang orang tegap dalam Barisan Nasional (BN).
“Mawan, ku iya, seiku orang politik ti seruran talukka atur BN. Nya mih aku ngelawa iya (Mawan) nyadi pengabang ti dipebasa malam tu. Aku deka mai iya baru ba pengawa bukai ila,” ku Ali.
Kelimpah ari nya, temuai sereta pengabang malam nya mega diperindang seiku penyanyi Iban ti pegari iya nya Ricky Andrewson ke udah mujur ngerikod 11 iti almum lalu bulan Julai tu deka ngeluarka album baru ti mai rentak ballad enggau pop ke dikumbai iya Atas Nama Pengrindu.
Bela bisi ngulu atur pengawa nya, chairman pengatur pengawa Hamzah Ibrahim ke mega sapit chairman PBB N15 Muara Tuang, Tuai Miring (Lemambang) Suja Luntu, Kepala Polis Samarahan DSP Lee Chong Chern, sapit DO Rais Ahmad, Sapit Residen (Rama) John Awan enggau Sapit Residen (Pemansang) Abdul Khalid Manap.
PENGERAJA MAIN ASAL: Sekeda pengeraja ti dikembuan bansa Iban, Ajat Indu dibantaika seraban nembiak indu maya atur pengawa nya.