BECHUNTOKA PENEMU KEPALA MENTERI: Abu Kassim (tengah) madah Kepala Menteri Sarawak deka nyadi chunto makai suap. Sama bisi dalam gambar, Hamid (kiba) enggau Lu (kanan).
Iya mega nagang sida sebilik malutka diri enggau pekara nya
Dikarang Jacqueline R. David //
KUCHING: Enti deka berubah, ubah dulu ari atas lalu dititih sida dibaruh.
Baka nya mega enggau pengawa makai suap, begunaka sebengkah ubah ke patut belabuh ari atas lalu ditangkan enggau orang ke gawa ari baruh.
Ketuai Opis Makai Suap (SPRM) Tan Sri Abu Kassim Mohamed madahka opis nya berasai lantang ati laban maya ti betemu enggau Kepala Menteri Sarawak, Tan Sri Datuk Amar Adenan Satem kemari, iya setuju enggau ulah makai suap patut diseliah bala ketuai dulu, ke alai iya (Adenan) deka nyadi chunto ke manah, bini anak iya enda tau enggau minta lisin ke bisi bekaul enggau tanah, kayu tauka pekara bukai.
“Maya kami betemu enggau Kepala Menteri, iya (Adenan) bisi mantaika sekeda pekara ti dipelaba ulih diputar begulai enggau SPRM.
“Iya mega madahka diri setuju enggau perambu SPRM sereta nguji nyeliah sida sebilik ari bisi kaul enggau peminta lisin tanah tauka palan berimba kayu.
“Aku berasai temegah ati enggau polisi Kepala Menteri ke enda ngemendarka sida sebilik tauka kaban belayan, bini anak bisi kaul enggau pekara nya,” pia ku Abu Kassim seraya madahka nya timbal ke manah amat ari Kepala Menteri.
Iya madah pekara ke positif ti dipejalaika SPRM diatu iya nya betanyaka penemu ari perintah dulu sereta ngaul komuniti lalu mendingka penemu ari komuniti.
“Sebengkah agi pekara ke patut dikemerat, iya nya tebal agi sida tu bekeringka nama pemesai ari opis perintah, nama kaban politik tauka orang tengah laban ku sida iya, raban nya bisi kaul enggau nama orang besai sereta ulih ngemuntangka pengawa ke dikereja tauka peminta sida.
“Ukai semina ngena nama orang besai aja, sida tu beambi ulih nyuap ngena duit lebuh ti ngatur peminta sida.
“Enti sema bisi pekara ke baka tu nyadi, ripot ngagai SPRM, laban nya penyalah tauka makai suap,” ku Abu Kassim.
Iya madah munyi nya ba aum enggau media pengudah berandau sereta merarau enggau ketuai komuniti China Borneo Convention Centre Kuching (BCCK) ditu, kemari.
Ba pengawa bejualka minyak diesel, iya madah, pengawa ngelalai, enchuri tauka nyual diesel sabsidi ari perintah udah ngerugika perintah bebiliun ringgit. Berindik ari nya SPRM minta perintah mansik atur meri sabsidi nya baru.
Ngenang sentang kerejasama enggau komuniti China, iya madahka SPRM minta timpuh meri penerang ngagai mensia mayuh sereta komuniti China ke tebal agi ngereja pengawa ngambika SPRM ulih nyadi ejensi perintah ti ulih dikearapka.
Sebedau nya, kaban SPRM Tan Sri Datuk Amar Hamid Bugo madah maya betemu enggau Kepala Menteri, iya ukai semina nyukung pengawa munaska makai suap aja tang mega ngelalau ba pekara bukai, iya nya opis kandang menua patut terit agi bejalaika pengawa sida kelebih agi kandang menua ke endur berimbaka kampung enggau palan enchuri pasir.
Presiden Gerempung Ketuai Komuniti Cina sitak Kuching, Temenggung Lu Kim Yong madahka randau ke diatur SPRM enggau bal ketuai komuniti China nya sebengkah pekara ke manah.
Ku iya, ngelama tu komunti China kurang endar penemu ba pengawa ti dipejalaika SPRM.
“Enti bisi nemu pan, sida enggai ngiruhka diri. Bisi sekeda ke kala ngaul SPRM, tang laban peneleba ke enda entu manah, sida iya enggai ngiruhka diri agi.
“Taja pia, tu sebengkah atur ke manah laban SPRM udah nyanggup deka meri penerang ke silik agi ngagai komuniti China sereta mega bansa bukai. SPRMmega ngembuan juluk deka nyadi opis ke semak enggau rayat,” ku Lu.
Sama bisi nguluka aum media nya kemari, Direktor SPRM Sarawak Dato Bahri Mohamad Zin.