LONG LAMA: Komuniti ke ngelaban pengawa ngaga Tekat hidro-elekterik Baram ujung minggu tu tadi udah beserumpu ngatur pengawa Ngiling Tikai ba palan endur sida ngempang jalai di Long Lama, Baram.
Chairman Save Sarawak Riv-ers Network (SAVE Rivers), Peter Kallang madah, urung 500 iku nyengkaum bansa Iban ari Baram enggau Tinjar, Kenyah, Kayan, Berawan, Tering, Melayu, Penan enggau China ari Baram, Tinjar, Tutoh bela bisi ngulu pengerami nya.
“Pengerami nya udah digulu semua peranak menua tu. Semua ke datai ngulu pengerami nya udah mandangka kerejasama ke manah.
Adap ke pagi sehari nya ba rumah ke didiri endur bejalaika pengawa ngempang jalai nya, mensia mayuh ngereja mayuh macham pengawa dia baka nyumai, belagu sereta betanda lalu bisi mega sekeda ngias palan nya.
Mensia mayuh ke bisi dia sehari nya datai ari mayuh bengkah pupu raban bansa di Baram, lalu sida gaga ati sereta begulai enggau pangan diri,” ku penerang ti diemel Peter ngagai The Borneo Post kena Hari Satu tu tadi.
Sama bisi dia maya nya, peranak menua ari genturung pendiau bukai enggau pelilih menua bukai ti sama bela bisi ngempang jalai ngelaban pengawa berimbaka kayu nengah chara belalai sereta ngerampas tanah Adat Bansa Asal (NCR).
Ku Peter, atur pengawa ke penudi endar iya nya ngetas ranyai seraya nyuaka pemeri raban pengatur pengerami, ‘Baram Protection Action Committee’ (BPAC) ngambika bisi dikena melanja pengawa ngempang jalai ke dipejalaika di Long Lama nya.
Nangkan ke nya, sida mega lalu betanda, belagu sereta berami nyentuk ke hari seiti.
Lebuh ngelaluka penatai penyukung ngagai pengerami nya, Chairman BPAC, Philip Jau madahka diri teperansang ati meda sukung ari mayuh bengkah mensia kenyau sida bejalaika pengawa ngempang jalai nya kena 23 Oktober, taun nyin kemari.
“Pengerami Ngiling Tikai tu ngelaika pengawa ngempang jalai nya udah dipejalaika ngelama 250 hari.
Sukung pengawa ngempang jalai nuju palan endur ngaga tekat hidro-elekterik nya mengkang tegap.
Nengah penyampau sukung enggau kerejasama tu, kami ulih napi sebarang pekara ke nyadi dudi tu ila.
Kami ukai orang jai ti ngelanggar undang-undang tang kami peranak menua ti enda dikeibuh sereta didingaka sida penemu.
Kami deka ngetanka ungkup kami,” ku Philip.