70 peratus kaban SUPP Opar deka masuk TERAS
KUCHING: Tebal agi bala kaban Parti Seati Rayat Sarawak (SUPP) ba sitak Opar udah nadai agi pengarap ngagai parti nya lalu sida deka munaska bekau SUPP ba sitak nya.
Kaban Kunsil Nengeri (ADUN) Opar, Ranum Mina lebuh dirandau kemari madahka, kira 70 peratus kaban SUPP Opar nyukung pemutus iya pansut ari parti lalu masuk Parti Tenaga Rakyat Sarawak (TERAS).
Nangkan ke nya, ku Ranum, tebal agi ari penyampau sida nya udah besemaya deka nitihka singkang iya sereta deka ngerejista diri nyadi kaban TERAS.
“Ukai ajul bejaku enti aku nyebut sepemanjai timpuh dua renggat aku nyadi pengari rayat ba sitak Opar, aku ngasaika diri semina numpang nama SUPP.
“Udah nya, tebal agi rayat ba endur tu ngaku SUPP enda ulih mantu sida lalu udah datai maya iya sitak tu betuaika sebuah parti ke lebih ransing.
“Taja baka nya, tu ukai reti kami ngelaban Barisan Nasional (BN) tang laban sida udah nadai agi pengarap ngagai SUPP,” ku iya madah ngagai Utusan Borneo.
Nangkan ke nya, Ranum madah, iya seruran deka nitihka peminta rayat ba sitak Opar ke deka tama parti ke lebih ransing lalu ukai baka parti ke semina bepelasarka seiti bansa baka SUPP.
Pengingin tu udah lama ditatam peranak Dayak ke endang mayuh nguan menua Opar tang sida nadai jalai ngereja utai ke bansa nya laban kerusi tu endang udah diagih ungkup SUPP.
Kerusi N.1 Opar ditumbuh nyadi sitak baru maya taun 2006, nyengkaum mungkur menua Lundu udah dipechah baru dikena nempa sitak seiti agi ke dikumbai Tanjung Datu.
Opar ngembuan 6,716 pengundi Bidayuh (83 peratus), ditangkan 498 pengundi Iban enggau 452 pengundi China.
Ba pengawa Bepilih Nengeri (PRN) 2011, Ranum ke bediri ngena tiket SUPP menang enggau penyampau 2,006 pemayuh undi pengudah ke belaban enggau tiga iku chalun ke bukai.
Ranum mujur bulih 3,360 iti undi ngalahka chalun PKR Boniface Willy Tumek (1,354), chalun Bibas Joseph Jindy Peter Rosen (475) enggau chalun SNAP Stephen Sagir (674).