KELAI PENYIRU PERINTAH: Mawan (empat ari kiba) enggau Rayong (lima ari kiba) betabi enggau seiku ari Tuai Rumah ti nerima setipikit nyambung pangku pengawa iya. — Gambar Churchill Edward
Semua penyukung BN patut nyeliahka diri ari mendingka achuk sekeda orang ti kepapas
Dikarang Churchill Edward //
LUBOK ANTU: Menteri Pemansang Rama Tan Sri William Mawan Ikom ngelalau semua penyukung Barisan Nasional (BN) nyeliahka penemu sekeda orang ti ngumbai parti baru TERAS, enda disengkaum dalam BN.
Kaban parlimen (MP) Saratok ke mega kaban kunsil nengeri (ADUN) Pakan nya madah, penemu ti kepapas madahka TERAS parti penyakal enda patut dipending laban parti tu mih maya pengawa bepilih nengeri (PRN) tu ila, deka dikelala pengering seraya ngenegapka BN.
“Baka ni orang ngumbai TERAS parti penyakal enti semua menteri, sapit menteri sereta pengari rayat ti dipilih, kaban parti dalam BN. Tambah mega, dua iku menteri enggau empat sapit menteri dalam parti tu enda kala melakangka aum ti diatur BN.
Mawan bejaku munyi nya seraya ngenang diri ti nyadi Menteri Kanan sereta Menteri Pemansang Rama, pia mega Wong Soon Koh (Menteri Wang Ke-II ke mega Menteri Kaunsil Kandang Menua enggau Pemansang Raban Bansa), baka nya mega Datuk Peter Nansian Ngusie (Sapit Menteri Servis Komuniti), Datuk Sylvester Entrie Muran (Sapit Menteri Perengka Guna Mensia Mayuh), Datuk Dr Jerip Susil (Sapit Menteri Pengerai Mensia Mayuh) enggau Rosey Yunus (Sapit Menteri Pemansang Pelajar Tumu Anak Mit enggau Pemansang Ruang Bilik).
Kelimpah ari nya, tiga iku ADUN dalam parti TERAS iya nya Dr Johnical Rayong Ngipa (Engkilili), Ranum Mina (Opar) enggau Paulus Palu Gumbang (Batu Danau) sama bela orang ti angkun ke BN sereta besemaya ba mua Kepala Menteri Tan Sri Datuk Amar Adenan Satem kena 16 May tu tadi pengudah sida ningkilka diri ari SPDP enggau SUPP lalu masuk TERAS taja pan MP Baram Anyie Ngau matak diri sereta pulai baru ngagai SPDP lalu pia mega ADUN Pelagus ngendiauka diri, beminggu udah nya.
Bejaku maya atur pengawa nyuaka setipikit ngagai Tuai Rumah (TR) enggau Ketuai Genturung Pendiau (KK) di Balai Raya Skim Skrang semak Engkilili ditu, Mawan ngelalau semua kaban BN badu bekelikuh pasal status TERAS.
“Peneka sida nyebut, enti ukai ‘Teras’ sida tau ngumbai nya ‘Tebelian’ tang orang ke dalam nya semua BN lalu BN belama. Kami endang udah lama nyadi kaban BN. Logo tauka chop parti kami enda ibuh dikelikuh, indah bilun engkabang nadai logo pan nemu terebai,” tandu Mawan
Kelimpah ari 81 iku TR, lima ari sida nya orang baru lalu bisi 18 iku agi nganti setipikit sida.
Dulu ari nya, ba pengawa ke sebaka, Rayong ngelalau semua kaunsilor ke dipilih perintah BN nyeliahka diri ari balut penemu sereta achuk sekeda orang ti semina ngemeratka diri.
Iya mega madah, ukai semina perintah nyambung timpuh sida panjai agi tang penyampau kaunsilor di sitak nya mega ditambah mayuh agi.
“Ari nya kitai patut nemu, perintah BN seruran ngemeratka rayat lalu penemu orang ti bejai sereta bekelikuhka penuduk kami dalam TERAS nya semina dikena sida ngulihka penguntung diri.
Tandu iya, semua penyukung iya di sitak Engkilili endang kaban BN magang lalu iya ti menang maya pengawa bepilih ukai semina ketegal sukung ari beberapa ratus iku kaban SUPP aja.
Ba sitak nya, iya meda sukung peranak menua dia endang agi tegap enggau BN.
Penumbuh TERAS ku Rayong, sebengkah parti baru ti nerima sukung ari ‘ketuai di atas’ kena ngulihka mayuh agi sitak maya PRN tu ila.
“Aku enda ibuh nyebut sapa ‘ketuai di atas’ tang sida pechaya, nengah TERAS, BN deka ngulihka mayuh agi penuduk maya PRN ti deka datai tu,” ku iya.
Berebak enggau pengawa nya, Mawan ngungkupka RM15,000 ngagai tabung Yayasan Pendidikan 1Engkilili sereta RM15,000 ungkup JKKK Skim Skrang lalu Biro Indu sida mega RM15,000.
Kelimpah ari nya Rayong mega ngungkupka RM10,000 ngagai JKKK Skim Skrang lalu RM10,000 ungkup Biro Indu sida.
Sekeda ari legit pengawa malam nya ke alai Rayong nyuaka 3,700 iti peminta masuk nyadi kaban TERAS ngagai Mawan ke dipelaba dipilih nyadi presiden parti nya maya Aum Tiga Taun Sekali (TGM) ke deka diatur kena 26 Julai 2014 tu.
Kelimpah ari beratus mensia ti ngulu atur pengawa nya, bela bisi mega sekretari politik Kepala Menteri Peter Howell Jilan enggau Kijan Tonybee, sapit presiden SDNU Anthony Banyan, sekretari jeneral TERAS Banyi Beriak, SAO Brin Munsang ke ngarika DO Lubok Antu Jack Aman Luat, kepala polis Lubok Antu ASP James Jonathan enggau chairman JKKK Skim Skrang Lt Col (Rela) Silon Janda.