KUCHING: Menteri Muda Pemansang Nembiak (Nengeri) Datuk Abdul Karim Rahman Hamzah ngenadaika jaku ti madahka Sarawak diatu udah ngasaika tempias bansa enggau agama alai penyarut nya datai ari semenanjung.
Iya madah, endang bisi sekeda orang baka raban politik menua tu ke deka nyadi champian lalu mantaika isu baka ‘Kalimah Allah’ tang enti diperatika enggau silik, rayat di menua tu enda peduli ke semua utai tu.
“Naka ke diatu, komuniti Islam enggau ukai Islam enda kala charut di Sarawak. Endang amat bisi sekeda orang ‘paranoid’ ke seruran rerauh sereta nguji ngungkit isu ‘Kalimah Allah’ tang rayat di menua tu enda ibuhka pekara nya lalu diau sereta begulai baka selama.
“Ulah ekstrim dalam pengarap tauka bansa sebengkah penyelai di Sarawak, lalu enti bisi pan ke mandangka diri ‘dominan’ agi ari orang bukai lalu ngujungka iya deka ditagang bansa sida empu,” ku iya madah lebuh dikerandau ‘Utusan Borneo’ kemari.
Iya madah munyi nya lebuh diasuh nimbal sebuah berita portal ‘The Malaysian Insider’ bekaul enggau Sarawak ke diperitaka udah ngasai tempias penyarut entara bansa enggau jalai pengarap ari semenanjung.
Abdul Karim madah, enti diperatika suba urung taun 70 menya, alai bansa Melayu ngenggaika parti PAJAR lalu urung taun 80 enggau pun taun 90, bansa Dayak ngenggaika Parti Bangsa Dayak Sarawak (PBDS) laban kelalu ekstrim ba pekara bekaul enggau bansa.
“Sebarang pengawa ke nguji deka mai ekstrimis dalam pengarap tauka bansa ke Sarawak enda nerima sukung. Iya tetap enda mujur,” ku iya lalu nambah portal berita nya enda patut ngasuh rayat tekuing ati ba chara pendiau rayat di Sarawak.