SIBU: Pengawa kena nyeliah sindiket dadah beterabaika nembiak sekula patut dikemerat sereta dikejampat.
Menteri Muda Pemansang Raban Nembiak Datuk Abdul Karim Rahman Hamzah madah, enti laun ngatur pengawa dikena nyeliahka pekara tu tau ngeruga pengidup nembiak jemah ila.
“Pekara tu patut diputarka kitai enggau naka pengelengkas,” pia ku iya maya dipinta ngelansa ripot Bernama ti madahka sindiket dadah diatu nyau berani ngiga nembiak sekula nyual dadah.
Ba ripot Bernama, Sapit Menteri Dalam Nengeri Datuk Wan Junaidi Tuanku Jaafar madahka nembiak sekula diatu dikena sindiket dadah nyual dadah laban bulih untung ke mayuh agi enti dijual ba sekula.
Ku Wan Junaidi, nembiak muntang mendingka jaku tauka lengkas tepawah runding enggau jaku umbuk.
Berindik ari pekara tu, Wan Junaidi madah, sida deka ngiga palan ke patut ba menua tu alai ngatur program pelajar bekaul enggau pengawa munaska dadah.
Abdul Karim ti mega Kaban Kunsil Nengeri Asajaya mantaika penemu, bala raban sindiket dadah naka alah ngiga chara dikena ngulihka untung mayuh.
Raban tu ku iya, enda ngira baikka nembiak sekula, orang indu, orang seranta tauka kaya tauka orang bepelajar tinggi laban tuju sida endang deka nambah penyampau orang ke meli dadah.
“Apai indai, sekula, gerempung ukai dikuasa perintah, agensi penerita adat enggau perintah meseti meda pekara tu enggau silik agi,” pia ku iya madahka baru.
Ba pekara ti bekaul, Mandal Presiden Yayasan Pencegahan Jenayah Malaysia (MCPF) Tan Sri Lee Lam Thye minta ulah ti deka nyeliahka diri ari dipalut penusah dadah patut dikerekai ari umur agi biak.
Nembiak sekula ku iya, patut dibai nyemakka diri enggau program tauka pengawa ti mai penguntung ngagai pengerai tubuh baka lumba enggau main.