KUCHING: Gerempung Ukai Dikuasa Perintah (NGO) sereta semua piak ti bekaul ngembuan tanggungpengawa besaup enggau perintah nentuka pemujur 150 perambu ari 232 ti dibantaika ‘Negara-Negara Ahli Pertubuhan Bangsa-Bangsa Bersatu’ (PBB) ke diterima Malaysia dikena ngenegapka hak seseiku manusia.
Naib Pengerusi Datuk Dr. Khaw Lake Tee lebuh ditanya pekara nya dalam aum pengarang berita madahka, laban pekara ke dikenatai tauka perambu nya endang ari NGO lalu deka diperatika nengah Penilaian Penggalan Sejagat (UPR) Malaysia.
“Enti perintah udah bejalaika perambu nya, perintah patut bejalaika iya laban perintah patut nyaut nya dalam taun 2018 (maya UPR Kali Ketiga).
“Nya alai semua piak bisi tanggungpengawa nentuka komitmen perambu nya dipejalaika, ukai semina perintah enggau ejensi perintah tang mungkur semua ti bekaul, dikena mantu perintah ngamatka komitmen ke digaga perintah.
“Sebengkah chara dikena mantu iya nya semua piak nyengkaum NGO seruran ngingatka sida (perintah) enggau chara ngenataika pekara nya kelimpah ari mantu perintah bejalaika komitmen nya,” ku iya seraya madahka SUHAKAM matau pemansang syor ke diterima perintah Malaysia.
Khaw dulu ari nya meri licha SUHAKAM pasal UPR Kali Kedua ba sebengkah hotel ditu kemari seraya madahka sida iya ngaga Pelan Tindakan Susulan UPR pengudah riput asil UPR Malaysia kali kedua diterima sereta dikena Majlis Hak Asasi Manusia Bangsa-Bangsa Bersatu (UN HRC) kena 20 Mac 2014.
“Entara perambu ke diterima perintah Malaysia nyangkaum hak ekonomi, pengawa rama sereta adat enggau main asal, munaska penyeranta, pelajar, pengerai, hak orang indu enggau penyemela hak lelaki indu enggau nyeliahka bedagang mensia,” ku iya.
Nambahka nya iya madahka perintah Malaysia nyukung syor pasal ngenegapka ‘mekanisme hak asasi manusia kebangsaan’ enggau nyaga sereta ngibun hak orang nyelai pendiau (OKU), nembiak enggau pekara bekaul enggau pengereja pengawa ari menua luar.
UPR iya nya sebengkah mekanisme Majlis Hak Asasi Manusia (HRC) ti bekaul enggau rikut hak asasi manusia semua 192 Negara Anggota ke diperesa tiap empat setengah taun. UPR mekanisme baru ditumbuhka Persidangan Umum PBB nengah Resolusi 60/251 kena 15 Mac 2006.
UPR mekuh ngagai ngemanahka hak asasi manusia, ngemeran sereta meri komitmen hak asasi manusia Negara, bekunsi chara ti manah entara menua, nyukung sereta deka bekerejasama dalam ngelaku enggau nyaga hak asasi manusia enggau kebukai.
Berindik ari pekara nya iya madahka SUHAKAM chakah nerangka asil UPR Malaysia kali kedua nengah licha ti diatur serata menua nyengkaum di Sarawak ditu kemari.
Khaw dalam licha iya pengawa ngelicha berengkah tengan bulan Julai ngagai Ogos 2014, ti keterubah di Kuala Lumpur lalu ditangkan di Kuching (kemari), Kota Kinabalu, Johor Bahru, Pulau Pinang enggau Kuala Terengganu, kelimpah diatur enggau raban media.
“Licha tu sebengkah ari pekara dalam Pelan Tindakan Susualan UPR SUHAKAM enggau juluk deka meri penyedar enggau nambahka pemereti semua renggat ba perintah besai enggau nengeri pasal proses UPR sereta ngenukuka UPR ti diperambu dikemeran sereta dikemeran sebedau diperesa baru ba taun 2018 (kali ketiga).
“Licha tu mega dikena meransang mayuh agi ‘stakeholder, Corporate Social Organization’ (CSOs) sereta media pasal proses UPR,” ku iya.