KUALA LUMPUR: Seiku indu bepengarap Kristian kemari nerima pulai lapan singkap CD bekaul enggau pengarap Keristin pengudah dirampas Opis Menteri Dalam Menua, enam taun ke udah.
Jill Ireland Lawrence Bill ari Sarawak dikemendar ngempu semua CD nya pengudah Akim Kot Besai Datuk Zaleha Yusof ngemendarka pansik ke merintah Menteri Dalam Negeri maya nya (taun 2008) mulaika baru semua CD nya.
Ba pemutus nya, Zaleha ngemendarka peminta Jill nginsil pemutus Opis Menteri Dalam Menua ngetan enggau ngerampas lapan singkap CD ke dipenggi indu nya.
Akim nya mega merintah Menteri Dalam Menua enggau Perintah Malaysia ke nyadi responden mayar ungkus RM500 ngagai Jill.
Zaleha mutuska perintah ke dipansutka Menteri lebuh ngerampas CD nya dikumbai ‘ultra vires’.
“Nengah genteran tusun ukum, ‘Seksyen 9 Akta Mesin Cetak dan Penerbitan 1984’ bisi nyebut sentang kuasa ngetan semina diberi ngagai menteri, taja baka nya aku setuju perintah tu dikumbai ‘ultra vires’,” ku iya.
Zaleha mega madah, pengawa ke digaga pemesai kastam, Suzanah Muin ngerampas CD nya dikumbai ‘ultra vires’ lalu salah bepelasarka undang-undang.
CD nya dirampas kena 11 Mei, 2008 ba begunan lama Penyangkai Bilun Tambang Murah di Sepang.
CD bukai ngundan chap ke betulis ‘Cara Menggunakan Kunci Kerajaan Allah’, ‘Cara Hidup Dalam Kerajaan Allah’ enggau ‘Ibadah Yang Benar Dalam Kerajaan Allah’ ke dibai ari Indonesia.
Jill seiku indu ke gawa nyadi kerani minta kot enda ngibuhka pemutus opis ke ngerampas CD nya tang minta dipulaika baru CD nya. Indu tu diarika luyar Lim Heng Seng. — Bernama