Dikarang Judan Bungap
SIBU: Opis Pengelikun Sungai Sarawak (LSS) enda kakang ngelempaika adat tauka ukum enti pengempu ekspres ditemu ngundan penyampau penumpang ngelui tatak baka ti disebut dalam permit perengka pengangkut sungai.
Pemesai LSS William Jinep madah, sida deka chakah ngatur pengawa nyekat ba sungai ngambika atur nya semampai dititihka.
“Sida ke mai orang lebih ari penyampau ke ditatak tau dijil dua taun sereta diukumRM5,000 ari baruh Seksyen 34 (2) Ordinan Sungai Sarawak 1993,” ku iya madah ngagai pengarang berita.
Iya mantaika jaku nya maya dipinta ngelansa bansa ukum ke patut diletak ngagai sida ti sepeneka ati ngundan penumpang ari penyampau ke udah ditatak.
Ba pekara ti bekaul, opis tu belabuh ngatur pengawa nekat berengkah kilah ensana nyentuk ke 27 Julai lalu renggat ke dua belabuh 1 nyentuk 3 Ogos ti deka datai.
Ku Jinep, pengawa nyekat nya deka diatur ba sekeda endur lebih agi ba delta Rejang baka ba Tanjung Manis, Daro, Dalat, Oya, Pusa, enggau tungka ke Kuching- Tanjung Manis.
Enggau nya iya ngelalau mensia mayuh ngambika meli tikit tumu.
LSS udah nengkebang macham bengkah chara dikena ngurangka agi penyalah mai orang kelalu mayuh nyengkaum neritka ‘No Ticket, No Entry’ ba semua penyangkai besai serata Sarawak berengkah 1 Mei taun tu tadi.
Kelimpah ari nya, LSS minta bala mayuh ngerijista nama dulu di kaunter sebedau nepan ekspress.
Nambahka nya mega, LSS minta bala mayuh lengkas madah tauka ngeripot ngagai sida nyema bisi meda penyalah nyadi.
“Ambika banding baka enda chukup kereban pengelikun enggau bisi meda pekara ke tau ngeruga pengelikun ba ekspress nyengkaum semampai meratika pemayuh bala ke nepan,” ku iya madahka baru.