KUCHING: Hari ti nempa mayuh sejarah, 22 Julai 1963 patut nyadi pengingat semua rayat Sarawak laban sehari nya mih nengeri tu teulihka pengelepas sereta merintah diri.
Taja pia, Yang Dipertua Ikatan Graduan Melayu Sarawak Datu Dr.
Sanib Said madah, iya enda tentu lantang ati ngagai sekeda orang ari luar Sarawak ti nguji madamka pengerami besejarah nya.
Nitihku iya, semua rayat Sarawak patut ngetanka pengerami besejarah tu sereta enda ngemendarka orang luar ari Sarawak madamka hari ti besejarah nya.
“Kitai nadai nguji mejal ngatur pengawa ngumpul sukung pasal Malaysia.
Nyadi sebuah Persekutuan Malaysia, kami sayau sereta talukka nengeri enggau menua tu,” ku iya dalam aum pengarang berita ditu, kemari.
Dulu ari nya iya begulai enggau kaban Ikatan Graduan Melayu Sarawak ngayanka pantomim 227 ti nyeritaka sejarah Sarawak lebuh teulihka pengelepas sereta numbuhka perintah diri.
Berebak enggau tu iya madah, Ikatan Graduan Melayu Sarawak mega ngutuk sereta enda setuju enggau sekeda piak ti ngeruga tauka ngachuk penemu rayat Sarawak ke tuju politik nyengkaum mai baru perintah tauka kuasa British enggau Brooke ke nengeri tu.
“Ukai patut dikemegahka mai baru perintah tauka kuasa Brooke.
Kebuah pia, laban sida udah ngerampas peneka kitai nyengkaum mejal orang Melayu nyadi kuli sida,” ku iya.
Sanib madah, piak iya minta perintah nengeri di baruh iring Tan Sri Datuk Amar Adenan Satem enggau perintah besai dibaruh Datuk Seri Najib Tun Razak ngiga alternatif ngambi baru tanah adat bansa asal (NCR) ke dikembuan orang Melayu.
“Kebuah pia, maya perintah Bristish tauka Brooke, mayuh tanah orang Melayu dirampas lalu diatu bansa Melayu idup dalam pengurang.
“Bansa Melayu amat taluk ngagai perintah 51 taun ke udah lalu kitai (bansa Melayu) ke bendar, deposit tetap,” tandu iya.