Sarawak, China deka bekunsika pengelandik

0

Dikarang Rengenyan Labang

BEKUNSI PENGELANDIK, PENAU: Abg Johari enggau Yu (sepiak kiba Abg Jo) enggau ke bukai begambar
bebala mayuh ngayanka kerejasama entara dua menua deka dikenegapka agi.

KUCHING: Sarawak merambu deka ngepunka kerejasama enggau China kena ngulihka pengelandik enggau pemintar injinir menua nya lebih agi senentang pengawa ngatur tauka nyaga rampa menua nyerunyut pemansang.

Menteri Dagang Temuai Datuk Amar Abang Johari Tun Openg madah, pengelandik enggau pemintar pemadu baru dikena ngurus enggau nyaga rampa menua udah dikena di menua China enggau Singapore.

“Kitai ngelala sekeda kerejasama udah dipejalai entara piak kitai enggau China.

Pekara ke udah dikelala sereta diperambu deka dikemeranka kitai iya nya nguna pengelandik enggau pemintar injinir menua China lebih agi ba pengawa ngurus tauka nyaga rampa menua.

“Kitai bisi ngemansangka kandang endur baru kena ngemajuka pengawa berumah, lalu pemansang pengawa berumah deka dikemansang belalauka pengawa nyaga rampa menua, lebih agi di Kuching laban mengeri Kuching mayuh akses,” ku iya seraya madahka nya ulih dikena ngatur transformasyen ba sekeda kandang endur nengah program pengawa berumah.

Abang Johari mansutka pekara nya pengudah nerima penemuai basa ari Lembaga Pengerusi Chongqing Li Zhong Vilage Investment Co. Ltd, Yu Zhang enggau raban iya, ba Wisma Sultan Tengah ditu kemari.

Nitih penerang Abang Johari apin lama ke udah, iya bisi nemuai ngagai Tianjin, China sereta beratika chara pemadu baru dikena nyaga rampa menua ti dikemeranka menua nya ke sama dikemaranka di Singapore.

Bejaku baru iya madah, kerejasama nya deka dipejalaika entara Perbadanan Pembangunan Perumahan (HDC), Daya Builders enggau injinir ari menua China.

“Kami deka lebih fokus merati sekalaika kitai ulih bekerejasama sereta ngerembaika ekonomi entara kededua menua,” ku iya.

Kelimpah ari nya, Abang Johari madah, entara pekara bukai ke diperatika sereta dikerandauka lebuh nemuai ngagai menua China apin lama nyangkaum pekara ngurus sungai.

“Sbengkah agi pekara ke dikerandau enggau menua China iya nya kami ngasaika kitai ulih bekerejasama dalam transformaysen injinir laban sida (China) amat pakar tauka manah dalam injinir nyengkaum chara ngurus sungai enggau uras,” ku iya.

Nyempulang Abang Johari lebuh berandau enggau pengarang berita, Yu sereta ke bukai.