Dikarang Judan Bungap
Penegap penyerakup ti dikemeranka genap pupu raban bansa nyaup ngenukuka pengelikun menua tu
SIBU: Penegap penyerakup ti dikemeranka peranak menua ari genap pupu raban bansa ngenukuka pengelikun menua tu, ku Sekretari Politik Kepala Menteri Maurice Giri.
Ku iya, laya ti ngujungka rayat pambar tau ngujungka macham bengkah pekara ti enda manah nyadi baka begelumu bebala mayuh ba jalai alun, ngeransi lalu tau mega beperang.
“Enti semua tu udah nyadi, kitai enda ulih idup likun.
“Kitai enggai penyarut ke nyadi ba menua bukai ngelekai ngagai kitai ditu,” pia ku iya maya bejadika Program Ihya Ramadan ke diatur Opis Pekara Khas (JASA) renggat Parlimen Kanowit di Masjid Ar Rahman ditu, lemai kilah ensana.
Bela bisi datai maya tu iya nya Pemesai JASA Parlimen Kanowit Prisillina Petrus Sigat enggau Pemesai Opis Pemadah Pelilih Kanowit Wan Mohd Zuki Wan Ismail.
Maurice mega muji penyerakup sereta pemereti ati peranak menua kitai ditu seruran tegap.
“Enda milih bansa baik nya Iban, China, Melayu tauka bansa bukai semua patut ngemeran penyiru, ngambika rayat idup likun enggau pangan diri.
“Pemujur tu endang udah bisi kenyau ari suba lalu kitai diatu patut ngetanka pemujur tu enggau naka ulih,” ku iya madahka baru.
Ba pengerami nya, Maurice bisi nyuaka pemeri ngagai 40 iku bala dia beserimbai enggau Hari Raya Aidilfitri ti deka datai.