Dikarang Jacqueline David
MAMBARKA KOMUNITI BIDAYUH: Manyin (tengah) maya randau enggau tuai komuniti Bidayuh, ke sama disempulang Temenggong Austin Dimin (kanan) enggau ex-temenggung Datuk Stephen Jussem.
KUCHING: Penumbuh Parti Tenaga Rakyat Sarawak (TERAS) enggau United People’s Party (UPP) ti minta masuk nyadi komponen parti dalam Barisan Nasional (BN) deka mambarka komuniti Bidayuh nengeri tu.
Menteri Pemasang Infrastruktur enggau Penyambung Dato Sri Michael Manyin madah, naka ke diatu Sarawak udah bisi empat buah parti komponen BN, iya nya Parti Pesaka Bumiputera Bersatu (PBB), Parti Rakyat Sarawak (PRS), Parti Demokratik Progresif Sarawak (SPDP) enggau Parti Sa’ati Rayat Sarawak (SUPP), lalu enti sema dua buah parti baru diterima masuk ke dalam BN, iya deka nambah ngagai 6, lalu nya deka mambarka komuniti minoriti Bidayuh di nengeri tu.
“Maya aku dipilih dalam taun 1996 suba, gaya politik di Sarawak maya nya manah, nadai mayuh macham lalu kitai semina bisi PBB, SUPP, PBDS enggau SNAP.
“Enda lama udah nya, gaya politik betambah manah agi lebuh SNAP diganti enggau SPDP sereta PBDS diganti enggau PRS,” ku iya madah lebuh dikerandau pemberita pengudah bejadika randau ketuai komuniti sereta pemesai komuniti Bidayuh di Opis Indu Serakup Dayak Bidayuh Nasional (DBNA) di Jalai Kumpang ditu, kemari.
Urung 100 raban ketuai pupu komuniti Bidayuh bisi datai ngulu randau nya.
Manyin madah sebedau tu komuniti Bidayuh kala ngatur forum, lalu maya nya ku iya, enti diperatika komuniti Bidayuh ari sukut politik, sigi udah bepechah.
“Di dalam parti PBB sigi bisi Bidayuh, lalu baka nya mega dalam SUPP, PRS enggau SPDP. Kami udah besetuju dalam forum nya, ngiarka diri ari bepechah.
Kelebih agi maya pengawa bepilih besai, kami udah besetuju baka aku bediri di Tebedu, Datuk Frederick Bayoi (lebuh nya) di Kedup, Datuk Roland Sagah di Tarat, Datuk Dr Jerip Susil di Bengoh enggau Datuk Peter Nansian di Tasik Biru.
“Kami bediri di sitak diri tang iya ti duikemerat kami ngarika komuniti Bidayuh sereta BN, ukai ngena nama parti politik.
“Lebuh kami bekimpin, kami ngena jaku munyi nya, ukai ngena nama parti PBB, SUPP, PRS, tauka SPDP. Pelaba aku chara baka tu dipeda manah,” ku iya.
Tang diatu tauka maya taun 2016 ila, SUPP deka betengali alan enggau UPP, SPDP enggau TERAS.
Dalam parti tu, semua bisi pemesai Bidayuh, baka SUPP bisi Dr Jerip enggau Ranum Mina (ADUN Opar), Anthony Nogeh (SPDP) enggau Datuk Peter Nansian (TERAS).
“Kitai bisi 5 YB Bidayuh dalam 4 bengkah parti politik. Aku enda nemu nama penyadi nya ila, aku irau ati.
“Maya pengawa bepilih nengeri (PRN) dudi tu ila, anang berundingka parti politik tang kemeratka komuniti Bidayuh.
Nya alai sebedau PRN, kandang dua taun tu, kitai ngatur kuing ngenegapka pengari ari bansa Bidayuh,” ku iya seraya madahka pengawa nya ukai muntang diputar.
Iya nandu baru enti amat TERAS and UPP nya kaling BN tang enda mukai-mukai ila, Kepala Menteri enggau Menteri Besai mutuska orang ti deka bediri ba sesebengkah sitak nya ila, chalun ke endang ditemu menang (winnable candidate), tang bakani ku chalun ke endang ditemu menang ukai ari siak nya empu? “Aku ngarapka parti nya ila ulih nyadi kaling BN.
Aku nerima sapa ti diputuska Kepala Menteri enggau Menteri Besai laban aku pechaya pemesai tu deka ngena jaku ‘chalun ke ulih menang’, tang kadang-kadang jaku nya kelalu ‘subjektif’.
“Nya ukai pekara ke muntang tang aku ngarapka pemesai BN deka ngemujurka sida sereta ngarapka kededua pemesai tu deka ngembuan runding ke manah sereta betul maya nya ila,” ku iya.