PATUT DIKENEGAP: Wan (tengah) nerangka pemesai reti ngeme-ratka pengelikun garis antara menua ngagai pemberita seraya dipendingka Chai (kanan) enggau Lian maya atur pengawa nya.
KUCHING: Polis Diraja Malaysia (PDRM) enggau Opis Imigresen Malaysia dipinta besaup berati sereta numbuhka mayuh agi palan nyaga garis antara menua enggau Kompleks Alai Diperesa Kastam enggau CIQ sepemanjai garis antara menua Sarawak-Kalimantan ke pengelikun menua.
Sapit Menteri Dalam Menua Datuk Wan Junaidi Tuanku Jaafar madah, lebuh iya betemu enggau kededua opis kandang menua nya bekaul enggau licha pasal pengelikun garis antara menua tu empu.
“Garis antara Menua Sarawak-Kalimantan ti panjai nya nyangka muntang ditengah sebarang orang lalu berindik ari kitai bisi ‘jalai tikus’ baka diatu.
“Nya alai, aku minta polis enggau imigresen meri licha ngagai aku bekaul enggau pengelikun di garis menua sereta di serata menua Sarawak ari sukut penama sereta pemansut orang ari menua tu lalu minta sida iya bekerejasama ngiga endur alai palan meresa garis menua enggau CIQ.
“Taja pan gaya ke diatu diperatika agi ulih kemata raban pengelikun kitai, tang kitai enda ulih ngemuntangka utai bansa nya aja kelebih agi pengelikun, laban kitai enggai utai ke sama nyadi baka di Lahad Datu din,” ku iya.
Iya madah munyi nya ba aum media pengudah diberi penerang ulih polis enggau imigresen di Opis Indu Polis di Jalai Badruddin ditu, ensana.
Iya nandu baru, ke diatu menua Sarawak bisi garis antara menua ari Tanjung Datu ke Lawas dalam penyauh 2,100 kilometer lalu sebagi ari nya garis antara menua entara Sarawak enggau Kalimantan bedau tembu disukat semua.
“Nya alai, pekara tu berat endar digaga enggau jampat ngambika kitai nemu ni bagi garis menua ti disetuju kitai nitihka ‘Boundry Conventation’ ba taun 1891 kelia.
“Nitihka sukat nya, bisi sekeda endur deka dikelai ngena batu lalu ditangkan enggau rikod bacha GPS deka disimpan Indonesia enggau Malaysia (Sarawak) ke tau digaga nyadi rikod ngagai semua enti sema kitai bisi betapi enggau penanggul,” ku iya.
Kelimpah ari nya, Wan Junaidi madah, penekul sepemanjai empat kilometer mega diengkah ba tiap buah CIQ dalam pengawa nagang mensia ari ngena jalai ke enda dikemendar.
Iya madah, dinding penagang penyauh 500 meter patut digaga niti garis antara menua ti niti sitak kebun.
“Aku ngarapka Perintah Menua deka nitihka atur polis, lebih agi sida ke bisi kebun ba garis menua.
“Tu mega kena nagang penama orang ke enda nitih undang-undang ngagai menua tu taja sekeda orang ke endur sida iya gawa ngambi orang ari menua Indonesia gawa ba kebun sida tang kitai deka meda orang gawa tu tama kitu nitihka undang-undang,” ku iya lalu ngelalau orang mayuh ke ngambi orang ari menua luar gawa ba menua tu nitihka atur undang undang.
Sama bisi nguku aum media nya kemari, Pemangku Sapit Kepala Polis Sarawak Dato Dr Chai Khin Chung enggau Direktor Imigresen Menua, Datu Robert Lian.