KUCHING: Enda tetembuka profil kampung diri antara kebuah pemansang laun diberi ngagai kampung sida.
Perkara itu dibantaika Temenggung Bidayuh, Austin Dimin Niyon kemarin ba sesi dialog Ketuai bansa Bidayuh begulai enggau Menteri Pemansang Infrastruktur enggau Penyambung Dato Sri Michael Manyin ditu.
Ku Austin, pekara tu balat endar nyadi ba bala ketuai bansa Bidayuh sereta enda ngelantangka ati, laban nya pekara ke enda tau enda dikereja sesiku ketuai ba sebuah kampung.
“Aku enggai nyebut pasal Ketuai komuniti bukai, tang ditu aku madah, agi mayuh ketuai bansa Bidayuh enda bejalaika pengawa nya laban sida nyangka pekara tu enda berat.
“Dalam profil kampung tu, tiap penerang dipasukka dia beguna amat. Nya ukai semina nyengkaum penyampau peranak enggau pemesai bungkur kampung. Pemansang infrastruktur ke disepi naka ke diatu mungkur penyampau sida ke graduet ba tikas degree, diploma enggau setipikit pengelandik, penyampau indai tunggal, raban urang ke nyelai pendiau enggau penanggul ke ditapi di kampung,” ku iya.
Ku iya baru, perintah enda ulih nyendiaka agih belanja pemansang ngagai sesebuah kampung enti sida nadai profil kampung ke nyadi garis lalau.
Ku Austin profil ke tembu enda tau enda diserah ngagai iya ngambika diserahkan ngagai pengari rayat sitak nya sereta dikemanjaika ngagai Opis Kepala Menteri ngambi diperundingka.
Nya alai iya ngelalau ketuai bansa ke bedau ngaga nya jampat agi ngaduka nya ngambika enda pulaika penekul dudi ila.
Ba sesi ke sama mega iya nangkan ketuai bansa ngambika semampai berandau enggau Kaban Komiti Pemansang enggau Pengelikun Genturung Pendiau (JKKK) sida ngambika pelin pemansang kampung ulih diperambu mabah agi.
Iya mega madahka diri suah nerima sebana ti madahka ketua bansa nadai kalai nesau kaban JKKK baum sereta ngatur pengawa begulai enggau peranak kampung.
“Lebuh kenyadi Chairman JKKK ketuai bansa patut regas agi ngiring anak buah iya ngemajuka kampung ari aspek sosio ekonomi enggau pemansang,” ku iya.