KUCHING: Penumbuh Kaunsil Raban Tuai Bidayuh (BCE) deka diputuska pengujung taun tu, ku Penyanding Penemu Serakup Bansa Dayak Bidayuh, Dato Sri Michael Manyin anak Jawong.
Iya madah BCE deka nyadi sebuah serakup ke nyaga sereta meri penemu pasal adat pesaka Bidayuh.
Naka ke diatu, penumbuh kunsil tu agi ba renggat milih komiti lalu dikearapka ulih diputar ujung taun tu.
“Kaunsil tu ukai semina megai pangku pengawa nyaga adat pesaka Bidayuh tang nyadi penyanding penemu ngagai DBNA dalam pekara bekaul enggau adat pesaka Bidayuh ke majak lebang enda ditemu nembiak,” ku iya.
Iya madah munyi nya lebuh bejaku ba atur pengawa randau begulai enggau ketuai raban bansa Bidayuh di Indu Opis DBNA di Jalan Kumpang ditu, ensana.
Manyin ti mega Menteri Pemansang Infrastruktur enggau Penyambung madah, kaban BCE deka dipilih ari ketuai raban bansa, pepemesai kanan perintah baka ari opis Majlis Adat Istiadat Sarawak.
Iya nandu baru, enti sema BCE nya udah dipenyadi ila, pekara ke deka dikemeratka sida iya, iya nya netapka timpuh Hari Gawai ti patut diintu enti dibanding enggau ke diatu (ambika chunto pengawa Ngiling Tikai agi diatur kadang-kadang manggai ba bulan Ogos).
“Dikearap, bala ketuai raban bansa ulih mantu kitai dalam pekara tu bejuraika pengelama hari Gawai ti patut diintu.
Keimpah ari nya, chairman DBNA Datu Ik Pahon Joik madah, randau nya betuju ngulihka timbal ari semua ketuai raban bansa Bidayuh bekaul enggau pengawa ke udah sereta deka diatur sida nengah NGO.
“Kami ngarapka DBNA nyadi sebuah serakup ke besai ulih ngaga mayuh agi randau baka ke sehari tu, tauka deka bejurai pasal adat pesaka tauka sosio-ekonomi,” ku iya.
Kelimpah ari nya mega, iya ngelalau ketuai raban bansa ke bedau ngerijista diri nyadi kaban DBNA, tau ngerijista enggau jampat lalu tau mega nyadi mata enggau pending ejensi nya, ngulihka penerang bekaul enggau pemansang ke ulih dipejalai di sitak menua sida.