KOTA SAMARAHAN: Nyerumba pengerami Hari Raya Aidil Fitri tu, Sarawak Heart Foundation (SHF) ti betuaika ‘The Board of Trustees’, bini Kepala Menteri, Puan Sri Dato Jamilah Anu, Dato Anne Teng enggau Pauline Kon ngelawa pesakit tungkul ati di Palan Perubat Tunkul Ati Sepital Besai Sarawak (SGH) ditu, seraya merindang sida ke enda ulih ngintu hari besai nya begulai enggau sida sebilik laban ke benung berubat dia.
Jamilah ti disempulang Kepala Opis Kardiologi Dr Ong Tiong Kiam enggau Kepala Beputung Tungkul Ati Dr Jong Yuan Hsun ngelawa urung 80 iku pesakit tungkul ati, ke alai sida diberi kuih enggau biskut Hari Raya kelimpah ari ‘Angpow’ Raya ari SHF.
Sebedau tu, SHF bisi meri perengka kena beputung tungkul ati ke berega RM1.5 juta ngaga palan nya. Perengka nya ulih dikena beputung nengah chara abi mit.
SHF mega bisi meri ‘Portable Oxygen Concentrator’ ti dibeli enggau ungkus RM31,000 ke diberi ngagai pesakit nembiak di palan nya.
SHF mega aktif ngaga seminar, pengawa pemandang, forum ke mensia mayuh, beperesa pengerai enggau kimpin fizikal ke nyadi sebagi ari program meri penemu ngagai mensia mayuh bekaul enggau pengerai tungkul ati sereta penyakit bukai ke bekaul enggau penyakit nya.
Naka ke diatu, SHF bekerejasama enggau ‘Heart Foundation Malaysia’. Opis Menteri Pengerai, sepital. Ejensi opis kandang menua nyengkaum kompeni peribit mayuh udah ngaga seminar di serata menua.
Mensia mayuh ke deka meri sukung sereta tulung ngagai SHF tau betelefon ngagai opis nya nengah lumur 082-258212 tauka ngelawa laman web sida iya ba www.sarawakheartfoundation.org.my tauka nengah Facebook sida iya Sarawak Heart Foundation.