Dikarang Rengenyan Labang //
Atur tu patut dikenyakah lebih agi di Sibu ke endur penyakit denggi tu balat ngelekaiKUCHING: Kimpin 10 minit sekali seminggu meresi kandang rumah dikena munaska endur nyamuk aedes betelu, patut chakah dipejalaika di pelilih menua Sibu berindik ari menua nya ti ngerikodka kes denggi pemadu tinggi di Sarawak.
Menteri Kaunsil Kandang Menua enggau Pemansang Raban Bansa Dato Seri Wong Soon Koh madah, Sibu ngerikodka 308 kes denggi dalam timpuh 29 minggu keterubah taun tu.
Iya madah, kes denggi pemadu mayuh nyadi di Sibu iya nya 308 kes lalu ditangkanka Miri (98 kes), Kuching (79), Daro (56), Betong (36), Bintulu (35), Kapit enggau Saratok sama ngerikodka 31 kes, Serian (25), Belaga (22), Limbang (16), Sarikei (15), Tatau (14), sri Aman (13), Pakan (11), Simunjan enggau Marudi (10) lalu pelilih menua bukai ngerikodka kurang ari 10 kes.
“Di Sarawak dalam timpuh 29 minggu (naka 19 Julai 2014) ngerikodka 859 kes dibandingka timpuh sama taun 2013 ngerikutka 850 kes, tu ngayanka kes nambah 1.1 peratus.
“Kitai deka chakah agi ngatur kimpin 10 minit meresi kandang rumah dikena munaska palan nyamuk aedes betelu di Sibu lebih agi di Bukit Assek laban ti ngerikodka kes pemadu mayuh.
“Kebuah pia, laban di Sibu mayuh rumah suwa lalu orang ke nyuwa rumah nya enggai kiruh nyaga pemeresi kandang rumah, laban sida bepenemu nya ukai rumah sida empu,” ku iya seraya ngasaika kimpin nya endang patut chakah agi dipejalaika di Sibu kelimpah ari pelilih bukai di nengeri tu.
Wong mansutka pekara nya dalam aum pengarang berita bekaul enggau kes denggi di Sarawak ke diatur ba bilik aum Tingkat 2, Bangunan Baitulmakmur ditu, lemai kemari.
Berebak enggau tu Wong ngelalau rayat Sarawak ngambika meri awak diri meresi kandang rumah pengelama 10 minit sekali seminggu dikena nyeliahka kes denggi majak ngelekai sereta dikena nyaga pengerai diri sebilik.
“Sekali seminggu kitai enda tau enda meri awak ngagai diri empu meresi kandang rumah sereta munaska endur nyamuk aedes ulih betelu,” ku iya.
Lalu lebih agi nyerumba pengerami ke deka datai tu ila, mayuh bala deka pulai ari Semenanjung Malaysia, nya alai anang enda bejejaga enggaika sida bisi mai igi penyakit nya laban di Kuala Lumpur enggau Selangor ngerikod kes pemadu tinggi, ku iya.
Nitih penerang berita ari Opis Pengerai Sarawak, naka 23 Julai bisi ngerikodka tiga kes pemati ketegal denggi di nengeri tu iya nya dua kes di Serian enggau seiti kes di Kuching.
Naka ke diatu bisi 20 palan pengelekai denggi di serata Sarawak iya nya di Sibu ngerikodka bisi 14, Kapit (2) lalu Serian, Betong & Kuching sama seiti palan pengelekai aktif.
Kelimpah ari nya naka 23 Julai 2014, Opis Pengerai Sarawak enggau ‘Local Authorities’ bisi meresa sepenyampau 55,507 premis enggau juluk munaska sarang nyamuk betelu.
Ari penyampau nya (55,507) bisi 822 premis ditemu positif endur nyamuk betelu.
Dibaruh ‘Destruction of Disease Bearing Insect Act’ 1975, bisi ngeluarka 83 kompaun enggau penyampau RM44,000 lalu 263 dikeluarka notis.
Lalu ari penyampau ke kena kompaun bisi 81 kompaun udah dibayar enggau penyampau RM31,330.
Sama bisi ba aum pengarang berita kemari, Direktor Opis Pengerai Sarawak, Datu Dr. Zulkifli Jantan.