Lebih 10,000 peranak sitak Saratok suntuk ai

0

Penanggul tu berindik ari kemarau ti ngujungka palan Loji Meresi Ai di Nanga Lichok majak langkang

SARATOK: Lebih 10,000 iku peranak menua dalam sitak Parlimen Saratok diatu benung betapi enggau penanggul ngulihka ai beresi.

Penanggul tu bepun ari gaya hari ke balat endar angat sereta kemarau panjai ke udah nyadi ba pelilih mit menua ti ngujungka pemansut ai ke dipam Loji Meresi Ai di Nanga Lichok majak langkang.

Seiku peranak menua nya, Sunang Laka, 67, madah kemarau ke nyadi sekali tu nyelai ari ke kala nyadi sebedau tu.

“Nyentuk ke sehari tu, nyauka sebulan udah nadai ujan ditu.

“Tu ngujungka Sungai Seblak ke nyadi pemansut ai ke dipam ngagai Loji Meresi Ai di Nanga Lichok udah langkang, lalu bisi mega ba  sekeda endur di ulu sungai nya udah putus ai,” pia ku Sunang madah ngagai media,kemari.

Ku Sunang baru, peranak ba kandang menua Seblak Ulu, udah putus bekal ai beresi ti dibekal loji nya dalam kandang dua hari ke udah.

“Tu udah ngujungka peranak menua nya ngiga chara bukai ngulihka ai ke dikena sida ninting hari nyengkaum ngambi ai ari sekeda sungai ke semak enggau sida.

“Ai ari sungai nya meh ke dikena sida nuchi gari, mandi enggau sekeda utai bukai ninting hari, tang ungkup ai itup, tebal agi sida meli airmineral,” ku Sunang.

Nitihka gaya ti diperatika media ba sekeda endur di sitak Parlimen Saratok, tebal agi sida berangkah betapi enggau pemansut ai ke mimit lalu bisi mega ba sekeda endur tulin nadai ai agi pansut ari paip.

Peranak menua ba kandang Seblak Ulu, sida engka benasit manah agi laban bisi ai sungai ke chiru enggau beresi ti nyadi chara kedua endur sida ngulihka ai.

Taja pia, peranak menua ke dia ba tebing pantai baka di Kabong, Nyabor, Gerigat, Sessang, Perpat enggau endur bukai ke ngelingi nya, penanggul tu besai amat ba sida.

Mohd Rizal, 45, ari Kabong madah, dipelabaka musin kemarauke nyadi diatu bisi kaul enggau El Nino.

“Gaya hari ke panas udah ngujungka peranak menua ti diau ba tebing pantai majak abis stuk air ke ditaruh sida dalam tangki ai.

“Pekara tu udah ngirauka ati peranak menua nya. Enti kemarau tu majak panjai kami deka betapi enggau penanggul besai,” pia ku Mohd.

Ku iya baru, mayub pengawa ke dikereja besesehari ti bepanggai ba ai, dikinsil tauka dikurangka kami.

“Enti ngelama tu kami mandi tiga kali sehari, tang diatu laban ke deka ngelimat ai, kami mandi sekali sehari aja.

“Orang ti ngemeranka pengawa muka kedai ngirup enggau makai, tebal agi sida diatu udah berengkah ngena kereban ai enggau pemakai ti udah dikena lalu tau dibuai,” pia ku Mohd baru.

Ketegal nya mega, beberapa buah sekolah primari enggau sekondari ke bisi endur bemalam udah ngasuh nembiak pulai ke rumah sida ketegal penanggul ai nya.

Berebak enggau nya, bisi sekeda orang ti berasai enda puas ati tauka asa laban Loji Meresi Ai di Kaki Wong Saratok ke patut udah tau dikena kena bulan April tu tadi lalu bedau ulih beroperasyen nitihka pelin ke sepatut iya.

“Enti sema Loji Meresi Ai di Kaki Wong udah dikena, penanggul tu diatu ulih dikurang tauka diputar laban nengah operasyen dua buah loji nya ba kandang menua  tu ulih tetapika guna ai penyampau mensia ke majak mayuh ditu.

“Kami arapka, raban ke bekaul ulih jampat agi bejalaika pengawa sida ngambika Loji Meresi Ai Bersih Kaki Wong ulih dikena.

“Tebal agi peranak menua berasai asa endar ati penanggul tu, kelebih agi sebedau tu sida madahka loji aji nya ulih belabuh dikena sebedau Hari Gawai baka ke ditaburka raban ke bekaul ba surat kabar enggau media elektronik,” pia ku sekeda peranak menua nya lebuh ke berandau enggau pemberita kemari.