KUCHING: Peranak Sarawak anang irau sekalika undang-undang ‘Hudud’ dipejalaika ditu tauka enda laban nya patut dipejuraika enggau silik dulu.
Penyanding Penemu Parti Keadilan Rakyat (PKR) Datuk Seri Anwar Ibrahim madah, iya betatika pemerat Parti Tindakan Demokratik Sarawak (DAP) ke ngenggaika undang-undang ‘Hudud’ nya dikena ditu laban ba sekeda sitak menua bukai pan bisi udah madah munyi nya.
“Jangka aku forum Majlis Pakatan bisi udah nyebut pasal pekara tu laban ‘Private Motion Bill’ ke digaga Parti Islam Se-Malaysia (PAS), tang taja pia pemerat tu deka dibantai dalam aum ninting bulan Pakatan Rakyat enda lama agi.
“Tang jangka aku, pekara tu ulih dipejurai enggau manah laban undang-undang ‘hudud’ ke diperambuka semina bagi ke mit aja ukai seset undang-undang syariah, tang pemerat bukai mayuh agi bekaul enggau pengirau orang ukai Islam. Sekeda orang Islam pan ngenggaika undang-undang ‘hudud’ tu.
“Beri kami timpuh dulu bejuraika pekara tu laban naka ke diatu, agi kelalu tumu bejuraika pekara tu. Nya alai, ngagai bala kaban DAP kami di Sarawak, beri timpuh ngagai kami mansik proses tu dulu,” ku Anwar.
Bedau lama tu tadi, ba aum DAP sida iya nimbal madahka diri deka pansut ari gempung PR enti sema PR setuju bejalaika undang-undang ‘Hudud’ tu di Sarawak.
Chairman PKR Sarawak Baru Bian sebedau nya kala madah, Sarawak nadai penetap ba undang-undang nitihka jaku Menteri Besai dalam pekara ‘Hudud’ (ditabur kena 30 April), enggau ‘Sarawak Setuju ba pengawa ngempung Secular Malaysia’ (ditabur kena 18 Jun).
“Kami di PKR tetap bepegai tegut ba jamin ‘Sarawak Constitution’ enggau atur baka ke ditulis dalam ‘Malaysia Agreement’ enti sema undang-undang ‘Hudud’ nya dikena ditu keingatka konstitusyen menua tu dulu,” ku Baru.
Sebedau nya Anwar, Baru, mandal chairman PKR See Chee How enggau sekeda kaban PKR Menua nyambut ‘Hari Kemerdekaan Sarawak’, ti diatur di sebuah hotel ditu, kemari.
Dalam jaku iya nyambut Hari Kemerdekaan Sarawak ti disambut kena 22Julai, iya madah hak rayat setiap menua di Malaysia enda tau dirampas peneka ati nyengkaum hari besejarah.
Besemaka Sarawak nyapai hari merdeka lalu numbuhka perintah kediri empu kena 22 Julai 1963, iya madah, hari bulan nya patut dikeingatka rayat serata nengeri tu.
“Orang semenanjung pan patut dipadah haribulan nya, lalu pia mega enggau orang Sarawak, patut nemu sebarang penanggul ke nyadi di menua tu.
“Iya berat kena beratika rayat ari macham pupu bansa di menua tu mupuk bebasaka pangan diri,” ku iya.
Iya nandu baru, enti ryat meratika, bedau entu lama tu tadi datai kediatu, bisi sekeda orang nguji ngaga penyarut ngambika bansa kitai di menua tu charut enggau pangan diri.
“Kitai anang enggau orang bansa tu laban penyerakup kitai patut dijaga,” ku iya.
Sekeda ari jaku Baru nangkan nya, nanya berapa iku kitai nemu tauka kala diajar di sekula, iya nya urung 51 taun tu ke udah (kena 22Julai 1963), Sarawak nyadi sebuah menua ngatika diri enggau kabinet menua betuaika Kepala Menteri Tan Sri Stephen Kalong Ningkan?
“Maya hari besejarah nya, gabenur colonial Bristish ke pemadu penudi nyerahka perintah menua Sarawak ngagai orang Sarawak.
“Nyau betaun udah nya, kitai orang Sarawak dipadah Malaysia nyadi sebuah menua kediri digaga kena 31 Ogos 1957, lalu kitai pan buta nitihka hari bulan nya, tang ukai nya ke bendar.
Kitai rayat Sarawak majak landik, sereta bala nembiak kitai pan gagit ati deka nemu utai ke amat nyadi diatu,” ku Baru.