KUCHING: Gaya pangka fenomena El Nino iya nya musin kemarau di nengeri tu enda balat baka ke diadang dulu agi ari tu, pia ku Sapit Kepala Menteri Datuk Patinggi Tan Sri Alfred Jabu.
Ku iya, nitihka pansik Opis Pengemata Gaya Hari, tebal agi mengeri besai di Sarawak enda betapi enggau kemarau panjai lalu semina kandang endur nebing tasik ke bisi ngasaika pangka El Nino mimit.
“Puku rata pelilih menua di Sarawak enda ngasaika pangka ari fenomena El Nino munyika diadang dulu agi ari tu.
“Nitihka pansik Opis Pengemata Gaya Hari, pelilih Miri, Bintulu, Kapit enggau Kuching enda betapi enggau kemarau panjai.
“Semina kandang endur ba tebing tasik baka ke Pulau Bruit ba Mukah, Roban, Saratok, Spaoh, Debak enggau Betong bisi napi kemarau panjai sereta suntuk ai beresi. Taja pia semua nya udah diputar,’ku iya.
Iya mansutka jaku tu ba seiti aum enggau pengarang berita pengudah tembu ngulu Aum Komiti Pengintu Penusah Nengeri Sarawak (JPBNS) Fenomena El Nino di Wisma Bapa Malaysia ditu, kemari.
Jabu ke mega Chairman Komiti Pengintu Penusah Nengeri Sarawak (JPBNS) taja pia madah komiti ti betuaika iya empu udah nyikap diri napi sebarang penusah ke tau nyadi.
Iya ke mega Menteri Pemansang Menua Pesisir enggau Menteri Betanam Betupi Moden netapka semua ejensi ke bekaul udah sedia ba musin kemarau tu kelebih agi maya betapi enggau penusah angus rumah panjai tauka angus kampung berindik ari gaya hari ti kelalu angat.
“Kitai udah nyikap diri napi sebarang penusah ke tau nyadi. Lojistik kitai udah disikap enggau manah.
“Kelimpah ari nya, aum tu bisi mega berandauka pengawa ti patut ditusun kena napi musin landas ujung taun tu.
“Tebal agi dalam bulan November, Disember enggau pun taun iya nya bulan Januari kitai deka betapi enggau ujan bangat ti tau ngujungka penusah ampuh bah,”ku iya.
Bela datai Sapit Sekretari Perintah Nengeri Datu Misnu Taha.