JKR, JKM besaup nyadung ai beresi ngagai peranak menua di Saratok

0

MERI PENERANG: Jabu (tengah) bejaku ba aum pengarang berita di Wisma Bapa Malaysia kemari.

Palan Meresi Ai di Ng Lichok langkang maya musin kemarau ti ngujungka peranak menua di Saratok suntuk ai beresi

Dikarang Chris Bishop //

KUCHING: Sapit Kepala Menteri Datuk Patinggi Tan Sri Alfred Jabu netapka bekal ai beresi deka dianjung ninting hari ngagai pelilih menua Saratok enggau Be­tong ke benung betapi eng­gau penusah suntuk ai.

Ku iya, Opis Kereja Raya (JKR) enggau Opis Pengintu Pengelantang Pendiau (JKM) begempung nyadung bekal ai beresi ngagai genturung pendiau bekenaka ‘tanker’ sereta tung ai.

“Sekeda kandang endur baka ba Saratok, Betong, Spaoh, Debak enggau Roban udah enda ujan ngelama 3 minggu nyentuk ke sebulan.

“Diatu, ba kandang endur ke nadai bekal ai beresi, tiap buah ruang bilik diberi 2 kutak ai irup (ai mineral) lalu bantu tu dianjung ninting hari,’ku iya.

Jabu mansutka jaku tu ba seiti aum pengarang berita pengudah tembu ngulu Aum Komiti Ngintu Penusah Nengeri Sarawak (JPBNS) Fenomena El Nino di Wisma Bapa Malaysia ditu, kemari.

Iya ke mega Menteri Pe­mansang Menua Pesisir sereta Menteri Betanam Betupi Moden madah penusah sun­tuk ai tu udah diintu ejensi ke diberi pangku pengawa eng­gau manah lalu semua gentu­

rung pendiau nyengkaum ke jauh di Ulu deka dipatau.

“Kitai deka nentuka maya pengerami Hari Raya ti deka datai tu, rayat enda betapi enggau penusah suntuk bekal ai beresi.

“Aku bisi ba Betong kemari (ensanus), lalu ngansak kon­trektor ke ngaga Loji Meresi Ai di Kaki Wong ngenyampat kereja nembuka projek nya. Projek nya patut udah tembu digaga diatu,’ku iya ke mega ADUN Layar.

Lebih 10,000 iku peranak menua Saratok enggau Betong benung betapi enggau penusah nya ke bepun ari gaya hari ke balat angat sereta kemarau panjai ti ngujungka pemansut ai ke dipam ba Loji Meresi Ai di Nanga Lichok langkang.

Peranak pechaya, penusah nya ulih diseliah enti Loji Meresi Ai di Kaki Wong, Saratok udah ulih dikena.

Nitihka perambu asal, loji Meresi ai Kaki Wong patut udah tau dikena kena bulan April tu tadi tang lalu bedau ulih beroperasyen nitihka pelin ke sepatut iya.