PPD di tetiap pelilih menua dipinta ngeriput ngagai JPN enti bisi nemu sekula suntuk ai ngambi penanggul nya diputarka
Dikarang Patricia Gari //
KUCHING: Opis Pelajar Nengeri (JPN) benung matau enggau silik sekula ba kandang menua pesisir sereta tebing tasik sekumbang musin kemarau ke benung diasai di Sarawak maya ke diatu.
Direktor opis nya Datu Adillah Adam (gambar) madah tiap maya musin kemarau, tebal agi sekula kelebih agi sekula primari ba menua pesisir enggau tebing tasik baka ke di Belaga sereta Baram deka betapi enggau penusah suntuk ai beresi.
Ku iya, ari penyampau 1,265 buah sekula primari di nengeri tu, urung 70 peratus sekula ba menua pesisir enggau tebing tasik ti mengkang nerima bekal ai beresi nengah chara bukai tauka bekal alternatif.
Berindik enggau iya madahka JPN nengah Opis Pelajar Pelilih Menua deka matau pekara nya ba tiap buah
sekula ke suah agi dituntung penusah nya.
“Opis pelajar ngarapka pemesai ba Opis Pelajar di tetiap pelilih menua (PPD) ulih ngeriput ngagai kitai enggau lengkas enti bisi tetemuka sekula ke benung betapi enggau penusah suntuk bekal ai beresi.
“Atur mutarka penanggul nya patut dikereja enggau lengkas nyengkaum nganjung bekal ai ngagai sekula ngambika pelajar raban nembiak enda tejanggal,” ku iya lebuh dikerandau kemari.
Iya madah enti bisi sekula napi penusah nya, JPN deka ngenataika pekara nya ngagai ejensi ke megai tanggung pengawa baka ke Opis Kereja Raya (JKR) enggau Opis Pengintu Pengelantang Pendiau (JKM) ngambika bekal ai beresi ulih dianjung enggau lengkas.
Naka ke kemari, Abdillah madah nadai nerima sebarang riput ari PPD sentang sekula ke bisi betapi enggau penusah suntuk bekal ai ke alai penusah nya diatu diintu enggau manah pengudah bisi ujan dalam kandang dua tiga hari ke udah.
“Ngarapka gaya hari majak manah lalu nadai sekula ditutup ketegal penusah tu.
“Nambahka nya, sekula deka kemisi ujung minggu tu nyerumba pengerami Hari Raya ke alai nembiak kelebih sida ke bemalam ba sekula deka pulai ke rumah diri,’ku iya.