KUCHING: Kaban Kunsil Nengeri (ADUN) Krian Ali Biju, enda lantang ati enggau kontraktor ti enda mujur nembuka projek Loji Meresi Ai Saratok nitihka pelin ti ngujungka peranak menua betapi enggau penanggul ai maya musin panas tu.
“Projek nya patut tembu digaga dalam bulan Jun taun seiti nyin tadi tang kontraktor udah ngelanjarka kontrak projek nya empat kali, sereta nadai ditinggang ukum.
“Tu enda patut nyadi laban mayuh orang merinsa nadai ai ketegal kontraktor enda sikar bejalaika pengawa.
“Enti hari tu majak panas tauka kemarau,rayat deka balat agi merinsa,” pia ku iya bejaku ba aum media ke diatur ba opis PKR Stampin, ditu ensanus.
Ku Ali, ketegal lubah nembuka loji meresi ai baru nya, peranak menua di Saratok enggau kandang menua ngelingi nya ninting taun betapi enggau penanggul ke sama enti datai ba maya musin kemarau.
“Semua orang nemu Loji Meresi Ai Lichok nyauka langkang, nya alai kitai begunaka loji baru, tang kontraktor enda berumban nembuka projek nya sereta nadai madah kebuah enda ulih nembuka nya jampat.
“Naka ke diatu, tiga buah sekula sekondari, SMK Saratok, SMK Ugama udah tutup lalu semina mimit aja penyampau nembiak nurun besekula ba SMK Bahasa Malaysia Saratok laban ke nadai ai.
“Penanggul ai tu ukai semina peranak ba kandang pasar aja tang di rumah panjai enggau kampung. Bisi mega sekeda orang kampung ke nadai mandi kenyau ari beberapa hari ke udah. Taja pan raban bekuasa bisi mantu nganjung ai tang nya enda chukup.
“Tambah mega, Hari Raya deka diintu enda lama agi, kati gaya sida deka ngintu Hari Raya enti nadai ai ?,” tanya iya.
Ali mantaika pengirau ati laban b isi sekeda orang ke deka beambi ulih ari penanggul ke nyadi tu.
“Kami irau ati enggaika bisi sekeda orang beambih ulih ari penggul tu baka nikika rega ai irup, ti deka nambahka pemerinsa sida ke udah tusah,” ku iya.
Enti Loji Meresi Air Saratok nya tembu digaga ila ulih mekalka ai ngagai urung 50,000 iku peranak di menua Saratok.