KUCHING: Tuai Megai Menua (TYT) Tun Pehin Sri Abdul Taib Mahmud enggau bini iya, Toh Puan Ragad Kurdi Taib deka nyambut penatai pengabang ba hari keterubah, Hari Raya di Astana, Petra Jaya belabuh ari pukul 11 pagi nyentuk ke pukul 12.30 tengahari, lalu nangkan nya belabuh ari pukul 3.30 lemai nyentuk ke pukul 5 lemai.
Hari keterubah Hari Raya nya diungkupka ngagai bala menteri kabinet menua enggau perintah besai sereta pemesai bukai.
Kena hari kedua Hari Raya, Tun Pehin Sri Taib enggau bini iya deka ngelaluka kepala opis sereta ejensi perintah enggau kompeni peribit sereta mensia mayuh bukai belabuh ari pukul 10:30 pagi nyentuk ke pukul 1 ngalih hari.
Mensia mayuh ti datai ngabang ngagai Tuai Menua enggau sida sebilik dipinta ngena gari ke manah.
Ba Hari Raya ketiga enggau ke empat, Pehin Sri Taib deka ngabang ngagai pemesai bukai, sida sebilik enggau ngagai bala pangan iya di Miri enggau Sibu.
Berebak enggau nya, Kepala Menteri, Tan Sri Datuk Amar Adenan Satem enggau bini iya, Puan Sri Dato Jamilah Anu deka nyambut penatai pengabang nyerumba Hari Raya di Palan Konvensyen Borneo Kuching (BCCK) ba hari keterubah enggau hari kedua Hari Raya.
Hari keterubah, iya enggau bini iya deka nyambut penatai mensia mayuh belabuh ari pukul 10:30 pagi nyentuk ke pukul 12:30 tengahari, udah nya ditampung baru ari pukul 2 ngalih hari nyentuk ke pukul 4 lemai, lalu ba hari kedua, belabuh ari pukul 10 pagi nyentuk ke pukul 12 tengahari.
Servis bas deka disediaka lalu endur berambi sereta ngetu, iya nya di Dewan Kunsil Negeri, enggau ba One-Stop Commercial Centre enda jauh ari lampu trafik ba Pending/ Jematan Tun Sallehuddin.
Kelimpah ari nya mega, Menteri Pengawa Berumah, Datuk Amar Abang Johari Tun Openg enggau bini iya, Datin Amar Juma’ani Tuanku Bujang deka nyambut pengabang maya Hari Raya ba dewan ba Kompleks Dewan Bahasa enggau Pustaka (DBP) di Petra Jaya.
Hari keterubah, sida iya deka nyambut penatai pengabang belabuh ari pukul 1 ngalih hari nyentuk ke pukul 5 lemai, lalu ba hari kedua belabuh ari pukul 11 pagi nyentuk ke pukul 5 lemai.
Menteri Pengatur Pemansang Pengeraja Asal enggau Rampa Menua II, Datuk Amar Awang Tengah Ali Hassan enggau bini iya, Dato Dayang Morliah deka nyambut Hari Raya di genturung pendiau sida iya empu di Lawas.
Sida iya deka nyambut penatai pengabang ba Hari Raya kedua enggau ketiga belabuh ari pukul 11pagi di rumah sida iya empu ba Lot 1937, Taman Klasik Jalan Bunga Teratai Lawas.
Sekretari Perintah Menua Sarawak, Tan Sri Datuk Amar Mohd Morshidi Abdul Ghani enggau bini iya, Puan Sri Datin Amar Saptuyah deka nyambut penatai pengabang di rumah ba 381, Jalai Bunga Kasturi, Genturung Pendiau Pinang Jawa, Petra Jaya.
Kena hari keterubah, sida iya deka nyambut penatai pengabang sida iya belabuh ari pukul 1 ngalih hari nyentuk ke pukul 6 lemai lalu hari kedua, belabuh ari pukul 10 pagi nyentuk ke 6 lemai.
Hari Raya dipelaba deka diintu kena 28 Julai tu ila.