SIBU: Bala anak indu kelebih agi bansa Dayak ke agi rumpas ba serata nengeri tu ditesau bela ngambi bagi ba Pekit Kumang beserimbai enggau Pengerami Mantaika Main Asal Dayak Borneo (BDCF) 2014.
Chairperson Komiti Pekit Angelyn Uchi Maseng (gambar) madah, pekit tu tebuka ngagai indu dara bansa Dayak ke berumur 18 taun ke atas lalu enda tuai ari 30 taun kena 30 Julai 2014.
“Atur ke bukai enggau pekit tu iya nya bala sida (indu) ke nyereta pekit meseti ngembuan peninggi enda kurang ari 5 kaki 2 inchi,” pia ku iya madah ngagai pengarang berita, kemari.
Ku Uchi, pekit serak tu deka dibagi ngagai tiga renggat iya nya ba renggat keterubah (preliminary round) bala pesereta deka besemekih enggau pangan diri kena 19 Ogos tu sebedau besemekih ba renggat kedua (semi-final) kena 20 Ogos lalu besemekih ba rengat kepenudi (final) ngulihka gelar champian kena 21 Ogos 2014.
Semua bagi renggat nya deka diatur ba panggau Dayak, BDCF pukul 9 malam.
“Ba renggat kepenudi, bala pesereta meseti ngena ngepan asal Iban magang,” ku iya madah.
Nambahka nya, ku Uchi, bala pemekit deka diberi poin ari pemajik gamal (70 peratus), pemerani diri enggau ngepan (20 peratus) enggau pemanah raras tubuh (10 peratus).
Champian pekit serak tu deka nerima perais mata duit RM3,000 sereta disempulang tropi, selampai enggau hamper.
Penuduk lumur dua diberi perais mata duit RM2,000 lalu penuduk lumur tiga, RM1,000 sereta bela disempulang enggau tropi, selampai enggau hamper.
Perais mata duit RM500 deka diberi ngagai pesereta ke mujur bulih penuduk lumur empat enggau lima.
Perais tanda pengaga ati, iya nya mata duit RM300 deka diberi ngagai pesereta ke bulih lumur enam ngagai lumur 10.
Pom pekit enggau penerang ke silik tau ditanya ngagai Uchi nengah lumur 016-882 5861 tauka 084-336 077, Rose Chukan (013-831 3990), Claudia Dieo (019-8346803, RTM Sibu (084-334 039) enggau Senorita Salleh (084-318 108).
Pom enggau pekit tu enda tau laun dianjung ngagai komiti pengatur pekit iya nya enda ngelui 12 Ogos 2014.