KUCHING: Gerempung Pematih Anak Mit Berejista Sarawak (PPKBS) deka ngatur pengawa ngumpul belanja nyerumba program Hari Taska kena 10 Ogos tu berengkah pukul 11 pagi ngagai 6 lemai bepalan ba Boulevard Shopping Mall, ditu.
Presiden PPKBS Jennifer Ling madahka, nyerumba Hari Taska nya mega kaban gerempung deka muka Taska ngagai orang mayuh kena 16 Ogos tu lalu orang mayuh diperansang datai ngagai Taska ti bisi ngayanka sepanduk ‘Hari Taska Open Day’,
“Asil belanja ke digumpul nya ila deka diberi ngagai gerempung ti nyaga pengelantang anak mit ke nyelai pendiau (OKU) baka Wishesland (Gerempung Celebral Palsy), Dyslexia Association of Sarawak, Kuching Autistic Association, ngambika teulihka jaga tauka ibun enggau pelajar tumu ari mit.
“Tuju kitai ngerami Hari Taska dikena nambahka pemereti ati ngagai orang mayuh pasal tanggungpengawa Taska ti berejister, servis nyaga anak mit ti bekualiti, ngelakuka pemanah guna pelajar tumu anak mit kelimpah ari ngenegapka penyerakup semua pengereja pengawa Taska enggau apai indai nengah projek kerejasama,” ku iya nengah penerang berita.
Iya madahka Hari Taska 2014 berambaika leka jaku ‘Ensuring R.E.S.P.E.C.T. for our children’ ti mekuh ngagai kuasa nyaga enggau penau anak mit nengah pengawa nyendiaka kandang endur ti likun, sama rata, likun endur bemain, adat enggau main asal sereta pemansang.
Pengerami nya ila deka dipenyadika Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah.
Kelimpah ari nya pengawa bejual barang pemakai enggau mai anak bemain ba gerai bemain mega dibuka ngagai orang mayuh.
“Apai indai ulih ngambi penerang pasal anak ari mayuh kaunter penerang ke bisi disediaka kami,” ku iya.
Jennifer kelimpah ari nya madahka PPKBS mega bisi ngatur sesi penerang ke dikumbai ‘Kursus Asuhan Permata’ ba bulan September 2014 di Kuching enggau Sibu.
Kus nya ulih dipasuk pengajar tumu anak mit, operator penyeridi anak mit, apai indai enggau barang sapa orang ti deka nemu silik pasal chara matih anak mit.
Iya madahka tuju nya mega dikena gerempung ngangkatka tikas kualiti servis nyaga anak mit di Taska nengah kus, seminar enggau bengkel ke diungkup ngagai pengereja pengawa Taska, apai indai enggau sebarang sapa ti bisi pengerindu deka ngajar enggau ngibun anak mit.
“Kus tu pasal Kurikulum Permata Negara ti patut dititihka semua Taska nyengkaum undang-undang bekaul enggau Taska, pemesai guna nyaga enggau chara tumu ngajar anak, meretika ulah enggau runding anak mit, nyaga enggau ngelanggur aktiviti senipak enggau umur sereta ke bukai.
“Pengudah tembu kus tu, pesereta deka nerima setipikit ari Opis Pengintu Pengelantang Pendiau Mensia Mayuh (JKM) ti diaku di serata Malaysia,” ku iya.
Sebarang tanya bekaul enggau program pengerami Hari Taska 2014 tau telefon ngagai Ng Lee Boon ba lumur 019 8161658, lalu pasal Kursus Asuhan Permata tau telefon ngagai Jennifer 019 8740573 (Kuching) enggau Yiu Sii Mink 013 8246686 (Sibu).