People’s Progressive Party diatu mujur ngerejista 54,000 iku kaban di Sarawak
KUCHING: Raban orang ti ngelakuka sebengkah parti ari Semenanjung Malaysia ke dikumbai People’s Progressive Party (PPP) di Sarawak mengkang ngining diterima dalam serakup Barisan Nasional (BN) Nengeri.
Ba seiti penerang ke dipansut kemari, PPP Sarawak meri jaku puji ngagai Parti Tenaga Rakyat Sarawak (Teras) enggau United People’s Party (UPP) ke diberita segulai sejalai enggau BN Nengeri pengudah diarika raban ketuai ke dipilih rayat enggau sekeda raban menteri.
Ba kaul ke sama, PPP Sarawak ngarap diberi basa nunda kededua parti baru nya pengudah parti nya diatu mujur ngerejista 54,000 iku kaban di Sarawak kenyau ti ditumbuh ba bulan Februari 2008 suba.
Mandal Presiden PPP Sarawak Dr Charles Liew madah, ari penyampau 54,000 iku kaban nya, 30,000 direjista di Bandar Kuching enggau laluh iya ke bukai direjista di Stampin.
Iya madah PPP ngerembai ke Sarawak ari pinta peranak nengeri tu empu.
“Tajapan kitai sebengkah ari parti dalam serakup Barisan Nasional (BN) renggat perintah besai tang ba renggat perintah perintah nengeri, kitai lalu bedau diterima dalam serakup.
“Semua kaban parti baikka nya ba renggat pampang, pelilih menua enggau ketuai renggat nengeri udah meri sukung ngagai BN Nengeri maya pengawa bepilih besai 2008 enggau 2013 sereta pengawa bepilih nengeri 2011.
“Runding, ati enggau tubuh kami sigi seruran enggau Barisan Nasional tajapan kami mengkang nganti ba luar pintu,” ku iya.
Iya nambah, tajapan bedau diterima, raban ketuai parti deka majak meransang kaban dalam parti ngambika nyukung Barisan Nasional. “Tu semangat Barisan Nasional iya ke tulen,” ku iya.
PPP kala nganjung pengari bediri ba seiti penuduk parlimen iya nya di Kepung (Kuala Lumpur) enggau lima penuduk sitak kunsil nengeri di Melaka, Selangor, Perak enggau Kelantan.
PPP alah ba semua penuduk tang mengkang dalam serakup BN renggat perintah besai.
Ba kaul bukai, Teras ke dikemendar ditumbuh Opis Pengerejista Gerempung (ROS) ba taun 2013 majak angkat taun tu pengudah 10 iku ketuai ke dipilih rayat ari BN nyereta parti nya kenaka 15 Mei tu tadi.
Tajapia, empat iku ari sida nya nyerara diri ari Teras lalu nyereta UPP pengudah ROS meri pemendar parti nya ditumbuh.
Kaban Kunsil Nengeri (ADUN) Pakan ke mega Kaban Parlimen (MP) Saratok Tan Sri William Mawan Ikom diadang nyadi presiden Teras pengudah Aum Besai Ninting Taun (AGM) sehari tu.
Chairman SUPP pampang Sibu ke dulu suba Dato Sri Wong Soon Koh ti udah nyereta Teras ba bulan Mei tu tadi, disadang ngiring UPP.
Ba seiti aum pengarang berita ke diatur kenaka 17 Julai tu tadi, Mawan ke mega kala nyadi presiden SPDP sereta Wong mutuska deka meri servis ngagai rayat nengah dua parti politik ke bebida.
Ba Teras, Mawan ditegapka agi nengah sukung ADUN Tasik Biri Datuk Peter Nansian Ngusie, Datuk Sylvester Entrie Muran (Marudi), Rosey Yunus (Bekenu) enggau Paulus Palu Gumbang (Batu Danau).
Dulu agi ari nya, MP Baram Anyie Ngau bela nyereta Teras tang pengudah nya iya ngalih baru enggau SPDP.
Ngenegapka tim Wong, iya disukung ADUN Bengoh Datuk Dr Jerip Susil, Ranum Mina (Opar) enggau Dr Johnical Rayong Ngipa (Engkilili).