SIBU: Seiku indu ke diripotka lelang maya nguluka indai iya ngiga kemiding ba kandang Jalai Penasu Baru ditu, udah mujur ditemu seraban polis enggau sida sebilik ba kandang babas ke enda jauh lemai ensanus.
Raban polis nulung ngiga indu nya, betuaika Kepala Balai Polis Sentral ASP Herman Rakey tembu bejalaika pengawa sida urung pukul 5.00 lemai pengudah tiga hari berunggu sida ngiga indu nya.
Maya indu nya ditemu, iya dipeda chukup lelak sereta ikak, kelimpah bengap-bengap sereta tubuh enggau kaki iya bisi abi telih enggau rajai.
Indu ke bebansa Iban nya beumur 19 taun dibai ngagai Hospital Sibu ngambika diperubat sereta diperesa.
Polis diatu agi mansik indu nya sekalika iya nyadi mansa jenayah tauka enda nyentukka pemutus peresa iya ditemu udah tu.
Nitihka penerang, indu nya dipeda agi takut sereta lapar kenyau iya diripotka lelang pengelama tiga hari.
Kena Hari Dua minggu tu tadi, urung pukul 8.00 pagi, indu nya enggau indai iya ngiga kemiding ba kandang menua nya laban deka dijual.
Maya ke benung ngiga kemiding, indai indu nya bisi tedinggaka anak iya nyerauh lima kali, iya terus ngiga tang meh anak indu iya nya nadai temu.
Udah nya, indai indu nya terus ngaga ripot polis bekaul enggau pengelelang anak iya.
Berindik ari penusah nya, pengawa ngiga enggau nyelamat (SAR) terus dipejalaika nyentukka indu nya ditemu chukup lelak, ikak sereta lepi pengudah nadai makai tiga hari.