KAPIT: Kaban Parlimen Ulu Rajang, Wilson Ugak Kumbong empai lama udah nemuai seraya gawa ngagai Rumah Lamau Jenggut at Nanga Bueng, di batang Baleh.
Seraya ke nemuai nya iya lalu bejadi jematan besi ke digaga nengah PIAS wang turu YB,MP Ulu Rajang . Tuai Rumah Lamau berasai gaga endar ati sereta madahka perintah Barisan Nasional amat nitihka jaku nyendiaka deka infrastruktur ngagai rayat kelebih agi ke diau di rumah panjai iya di menua pesisir.
Kena nambahka pengaga ati peranak rumah panjai nya, Wilson Ugak lalu meri sebuah Televisyen enggau sebuah set Astro Njoi ngagai sida ngambika sida ulih nemu berita ke nyadi sereta ke pemadu baru.
Lebuh ke bejaku, Ugak meri terima kasih ngagai semua penyukung enggau pengundi ke udah ngundi iya ari Baleh enggau Belaga maya PRU13 nyin tadi. Iya besemaya deka bejalaika pengawa enggau manah sereta ngemeratka utai ke deka diguna sida ba sitak parlimen nya. Semina nengah sukung ke kuat ari rayat ngagai pengari rayat aja ulih dikena ngemansangka sitak parlimen nya. Ugak dulu ari nya ngelalau sida ngambika bediri tegap ba belakang chalun Barisan Nasional maya pengawa bepilih Kunsil Nengeri ke deka diatur dalam taun 2016 ila.
“Anang nandu penyilap ke sama baka ke dikereja penyukung di Pelagus” pia ku iya. “Uji kita beratika, sesiku ADUN nerima pemadu mimit RM1.5 miliun ninting taun ke alai alam kandang 5 taun rayat di Pelagus rugi RM7.5 miliun geran pemansang labanpengari rayat ari penyakal nadai diungkupka geran nya. Nya alai anang entaruhka pengidup kita jemah ila nengah chara ngundi penyakal laban pemansang ulih dikemujurka belama semina nengah sukung ke diberi ngagai Barisan Nasional ”, pia ku Ugak.
Pengerami nya udah diatur Opis Lumba Nembiak enggau Main Kapit begempung enggau Palan Servis P.216 Hulu Rajang. Nyempulang nya mega bisi diatur licha ari Opis Pengerara Api enggau Penyah Penusah (BOMBA) bekaul enggau pekara nyeliahka penusah angus, ‘Parlimen Remaja’ ari Opis Lumba Nembiak enggau Main sereta licha ari Opis Tenaga Rakyat Bagi Menua Kapit.