SUPP ulih murus dada, ngerawang singkang

0

KUALA LUMPUR: Tujuh iku ex- kaban Parti Sa’ati Rakyat Sarawak (SUPP) kemari udah matak peminta akim nyerenih baru pemutus Opis Pengerejister Gerempung (ROS) laban ti enda nginsil parti nya.

Akim Kot Tinggi Datuk Zaleha Yusof ngemendarka peminta Datuk Dr Jerip Susil, Ranum Mina, Dr Johnnichal Rayong Ngipa, Shiling Banggit, Datuk Tiong Thai King, Suzanne Lee Tze Ha enggau Sia Jii Ming matak baru pekara nya.

Bela bisi ngulu prosiding nya luyar Edmund Bon ngarika raban peminta nya,Luyar Kanan Perintah Besai Khairul Fazly Kamarudin ngarika ROS enggau luyar R.Yatis ngarika SUPP.

Ku Edmund madah ngagai pemberita pengudah nya, kot ngemendarka peminta nya enda ngira perintah ba atas kos.

Dalam penerang ke disadung Edmund, sida ke minta nya madahka diri bisi peluang gawa ke rayat nengah sebuah parti baru iya nya Parti Rakyat Bersatu (UPP), ti ngujungka sida berunding baru ke alai manah agi enda ngemanjai peminta nyerenih baru pekara nya ngambika SUPP enda dikinsil.

“Awakka meh pekara ke udah nyadi suba lalu arapka kami sama bela ulih sama bela nyingkang ngetanka penegap politik enggau pengelikun di Sarawak,” pia ku sida dalam penerang ke dipansutka di tu.

Dalam peminta akim nyerenih baru pekara nya, sida madah kena bulan November 2011, sebedau parti nya ngatur Aum Besai Pengari Tiga Taun Sekali (TDC 2011), bisi nyadi pengawa nipu lebuh ke bepilih dalam parti.

Sida udah madahka pekara nya ngagai ROS, taja pia ROS lubah mutarka penanggul nya.

Sida mega madahka pemutus ROS kena 30 April ti enda nginsil SUPP enda diteritka agi tekala nya.

Sida mega minta perintah certiorari nginsil pemutus ROS nya sebaka enggau Seksyen 16 (1)(c) (ix) Akta Numbuhka Gerempung taun 1966. — Bernama