Sediaka awak pengelama 10 minit ninting minggu dikena ngiga enggau munaska serangan nyamuk Aedes, ku Wong
SIBU: Menteri Pemansang Raban Bansa enggau Kandang Menua Dato Sri Wong Soon Koh ngelalau mensia mayuh nyediaka awak pengelama 10 minit ninting minggu dikena ngiga enggau munaska serangan nyamuk Aedes dikena ngurangka penyakit denggi ari terus berampit.
Iya madah, atur pengawa ke bansa nya ulih dikereja seseiku orang, diri sebilik, orang ke sepiak rumah enggau semua orang dikena meresi kandang endur awakka nadai alai nyamuk Aedes betelu.
“Kes denggi pemadu balat nyadi ba sitak Zon 7. Utai tu nyadi berindik ari sitak nya tebal diuan orang ke diau nyuawa bilik tauka rumah. Sida enda tentu deka kiruhka pemeresi ba kandang ngelinggi rumah suwa.
“Nya alai, aku ngarapka sida ke diau ba Zon 7 enggau kandang ke ngelinggi nya ngemeratka pekara tu dikena nyeliahka diri empu enggau diri sebilik kena igi penyakit denggi,” ku iya lebuh dirandau ba bilik aum Opis Pengerai Menua Sibu, kemari.
Zon 7 nyengkaum Jalai Tiong Hua, Jalai Lai Chee, Jalai Pigeon, Lorong Jalai Oya, Jalai Hua Kiew, Jalai Geronggang, Jalai Nanyang Garden enggau Jalai Hardin.
Menua Sibu mungkur pelilih Sibu, Selangau enggau Kanowit ngerikod kira 337 kes denggi naka 25 Julai bebanding 147 kes denggi dirikodka taun seiti nyin kemari lalu taun tu dipeda bisi nambah kira 190 kes tauka 129 peratus.
“Nama utai ke beguna iya nya, kitai patut munaska serangan nyamuk Aedes enggau chara ngiga sereta munaska serangan nyamuk nya, awakka iya badu betelu,” ku iya.
Nangkan ke nya, Wong madah di Sarawak bepun ari bulan Januari ngagai 19 Julai tu tadi, penyampau kes denggi ke bisi diripot iya nya 859 kes bebanding 850 kes ba timpuh ke sebaka taun 2013, pekara tu terang amat mandangka penyampau kes tu majak nambah ngagai semilan iti kes tauka 1.1 peratus ditangkan tiga kes ngujungka pemati ketegal sakit nyamuk diripot naka ke diatu.
“Tiga kes ke ngujungka pemati ketegal sakit nyamuk tu nyadi ba Serian enggau Kuching bebanding dua kes ngujungka pemati nyadi taun seiti nyin kemari. Di Sibu, penyakit denggi ba taun 2010 udah ngujungka 10 iti kes ngujungka pemati lalu beratus iti kes denggi bisi dirikod,” ku Wong.
Kaban Kunsil Nengeri Bawang Assan nya mega bisi ngelalau mensia mayuh ngambika ulih nyediaka awak pengelama 10 minit ninting minggu endur meresi kandang alai sida diau sereta munaska serangan nyamuk Aedes.
Sama bisi datai maya tu Pemesai ari Opis Pengerai Menua Sibu Dr Muhammad Rais Abdullah, Sekretari Opis Kunsil Kandang Sibu (MPS) Hii Chang Kee, Sapit Chairman Opis Kunsil Menua Pesisir Pelilih Sibu (MDLBS) Oliver Kuo enggau Pemesai ari Opis Pengerai Rampa Menua Chong Kuek Sen.