Adenan
Penyerakup, pengelikun enggau pengelantang ke dikembuan kenyau ari kelia udah ngemegahka menua tu
KUCHING: Menua Sarawak enda ngemendarka ‘ekstremis’ ba batang pengarap enggau sida ke begedika bansa orang bukai tama ngagai menua tu, pia ku Kepala Menteri Tan Sri Datuk Amar Adenan Satem madah dalam jaku pesan Hari Raya iya ngagai rayat menua Sarawak ditu.
Ku Adenan, Sarawak benasit laban enda betapi enggau penanggul berat baka perang, bebunuh enggau pangan diri ke sama batang pengarap baka ke suah dipeda ba surat kabar enggau TV, tang ulah mensia mayuh di menua tu ke beserakup enggau pangan diri ari dulu kelia, ngasuh menua tu berasai temegah ati.
“Dalam konteks jaku bebatak asur enda chukup enti semina disema ngagai kaul entara rayat di menua Sarawak. Bebatak asur agi bisi mai reti ‘enda tau enda’. Kitai ukai semina bebatak asur enggau orang bukai ke enda sebaka enggau kitai tang bebasaka bida nya, enda ngira jalai pengarap, adat, tauka bansa,” ku iya.
Iya madah Sarawak agi ulih ngetanka pengelikun pengarap sereta pengawa rama laban rayat bisi basa enggau pangan sida bukai ke sebaka jalai pengarap enggau bansa.
“Nya alai, sekali agi aku madah menua Sarawak enda ngemendarka ‘ekstrimis’pengarap enggau sida ti begedika bansa bukai tama ngagai menua tu. Aku enda ngemendarka pekara ke baka nya ngachau penyerakup kitai, jalai pengarap kitai enggau pengawa rama menua tu,” ku iya.
Ari sukut ekonomi ku iya, Perintah deka terus beratika pengawa ngurangka tikas bida ekonomi entara kandang nengeri enggau menua pesisir sereta entara orang bepemisi enggau sida ke kurang pemisi.
“Menua tu mayuh pengeraja asal ke ulih dikemansangka enggau tusun ke manah, ngangkatka penuduk ekonomi sereta tikas pengelantang pendiau rayat.
“Perintah ti dipegai aku deka terus bejalaika atur ekonomi ke udah bisi diatu ke udah dipunka tuai pemesai ke sebedau tu. Atur pemansang ekonomi ke bisi diatu, kelebih agi SCORE nyadi jalai ke terang ke menua Sarawak nyadi menua maju manggai taun ba 2020.
“Aku ngelalau semua rayat Sarawak nyukung atur pemansang tu sereta enggau naka ulih sama ngangkatka ekonomi menua Sarawak, kelebih agi ba komuniti Bumiputera enggau rayat di menua pesisir,” ku iya.