Dikarang Chris Bishop //
Pengawa nya kena berandauka bantu ti patut diberi ngagai niang peranak Sarawak ba penusah MH17
PENYERAKUP PATUT DIKENEGAP: Adenan bela dipendingka Jamillah bejaku ngagai pengarang berita rambau pengawa ngelalu pengabang nyerumba Hari Raya di BCCK ensana.
KUCHING: Kepala Menteri (KM) Tan Sri Datuk Amar Adenan Satem deka ngatur sebengkah aum kabinet enda lama agi kena berandauka bengkah bantu ke patut diberi ngagai niang penumpang penusah bilun MAS MH17 apin lama ke udah.
Bejaku ba aum pengarang berita rambau pengawa ngelalu pengabang pengerami Hari Raya di Palan Aum Borneo Kuching (BCCK) ensana, Adenan madah bantu nya deka diberi kelebih agi ngagai peranak Sarawak ba penusah nya.
“Ba awak ke semak tu aku deka ngatur aum kabinet berandauka bengkah bantu ke patut diberi lebih agi ngagai peranak menua Sarawak ke ditabanka penusah bilun MAS MH17 labuh apin lama ke udah.
“Taja pia, aku bedau ulih bejurai panjai senentang pekara tu diatu lalu kitai patut sama bela ngenataika penyinu ngagai semua niang penumpang ba penusah bilun MH17 tu tadi,” ku iya ke disempulang bini Puan Sri Datuk Jamilah Anu.
Bilun MAS MH17ke ngumdan 298 iku penumpang nyengkaum kelasi bilun, 43 peranak Malaysia labuh di Donetsk timur Ukraine dipelaba ditimbak maya pejalai ari Amsterdam nuju Kuala Lumpur kenaka 17 julai tu tadi.
Ba pengerami ke sama, Menteri Pemansang Tanah Tan Sri James Masing ngarap rayat Malaysia bela besampika pengelenyau bilun MH370 kelimpah ari ngenataika penyinu ati ngagai semua niang penumpang bilun MH17 nya.
Ku iya, isa meh kitai udah nemu penusah ke nuntung MH17 tang MH370 lalu enda temu penunga tauka penyadi.
“Aku ngasai, kitai patut ngingatka MH370. Enti kitai besampika MH17 kitai mega patut besampika MH370.
“Kaban belayan MH370 tentu deka ngasaika sida enda dikeibuh enti kitai semina ngingatka MH17 belama, kitai patut besampi ungkup kededua MH17 enggau MH370,” ku iya lebuh berandau enggau pemberita.
Beribu rayat ke diau ngelingi Kuching datai ngerami pengawa ngelalu pengabang ke diatur kemari.
Adenan ba aum pengarang berita madah, pengawa ngabang ngagai pangan diri ba tiap pengerami patut dikemeran belama.
‘Tu meh penegap beserakup ke digenggam kitai ngelamatu,” ku iya seraya gaga nerima penatai pengabang.
Bela bisi ngulu atur pengawa nya, Sapit Kepala Menteri Datuk Patinggi Tan Sri Alfred Jabu, Menteri Pengawa Berumah ke mega Menteri Dagang Temuai Datuk Abang Johari Tun Abang Openg, Menteri Pengatur Pengeraja Asal enggau Rampa Menua II Datuk Amar Awang Tengah Ali Hassan sereta pemesai bukai.