SIBU: Bujang rumpas ke beumur entara 18 ngagai 29 taun di serata nengeri tu ditesau sereta diperansang ngambi bagi ba Pekit Keling Pengerami Mantaika Main Asal Dayak Borneo (BDCF) 2014 kena 21 Ogos ti deka datai beserimbai enggau Pengerami Mantaika Main Asal Borneo (BCF) ba Dataran Bandar Sibu Fasa I.
Nitihka penerang Chairman Komiti Pekit Keling BDCF 2014 Mejar Moses Ripai, orang ke rumpas sereta deka masuk pekit tu patut ngembuan peninggi enda kurang ari 5 kaki 8 inchi sereta ngembuan tukuh tubuh ti kering.
“Kelimpah ari nya, penyereta mega patut ngembuan pengelandik ambis nadai sebengkah ari main asal baka Ngajat, Kuntau, Bepantun tauka Bebiau enggau pengelandik ke bukai.
“Nambahka nya, penyereta mega patut ngena ngepan asal Iban baka terabai, lanjang, sirat, gagong, sangkoh enggau kerebai bukai maya pekit ke penudi ila,” ku iya maya aum media, empai lama tu tadi.
Bela bisi datai maya aum media tu iya nya sapit iya, Steven Rom.
Moses madah, gelar champian Keling BDCF 2014 deka mai pulai perais mata duit RM3,000 sereta disempulang trofi enggau hamper.
“Penuduk lumur dua mai perais mata duit RM2,000 lalu ditangkan perais mata duit RM1,000 ngagai penuduk lumur tiga sereta bela disempulang trofi enggau hamper.
“Penuduk lumur empat enggau lima mega bisi mai perais mata duit RM500 enggau hamper,” ku iya madahka baru.
Iya mega madah, penyereta ke bulih lumur enam ngagai 10 deka diberi perais RM300 enggau hamper.
Pom kena masuk pekit tu ulih diambi ari Hotel Paramount/Hotel Tanahmas tauka Bibi Cafe sebedau 6 Ogos ti deka datai.
Penerang silik tau ditanya ari Moses nengah lumur 019-4388306/019-8126955, Steven (019-8183855) tauka Francis Minggu (0198070997).