JAUH PENATAI KAMI: Raban Orang Ulu ari serata menua Sarawak begambar begulai enggau Taib sereta Ragad.
HARI Raya ti keterubah kena Hari Satu tu tadi (ensana) disambut enggau numbas pemesai.
Ba hari keterubah nya, raban menteri, pemesai sereta gerempung enggau pengari NGO bepeluang ngabang ngagai Astana alai Tuai Pemegai Menua Sarawak (TYT) Tun Pehin Sri Taib Mahmud, enggau bini iya, Toh Puan Ragad Kurdi Taib diau.
Taib, ti baru nyadi Tuai Pemegai Menua nyambut Hari Raya keterubah di Astana berengkah pukul 10.30 pagi enggau Ragad ngelaluka bala temuai iya, ke bisi datai pagi nya, iya nya Sapit Kepala Menteri Datuk Patinggi Tan Sri Alfred Jabu Numpang enggau bini iya, Dato Sri Empiang Jabu, Menteri Pemansang Rama, Tan Sri William Mawan Ikom enggau bini iya, Puan Sri Julia Mawan, Sapit Menteri Pemansang Menua Pesisir enggau Kandang Menua Datuk Alexander Nanta Linggi enggau bini iya, Datin Angelina Ujang enggau sekeda ADUN Dennis Ngau (Telang Usan), Johnichal Rayong (Engkilili), Sharifah Hasidah Sayeed Aman Ghazali (Samariang) enggau ke bukai.
Sekeda menteri enggau pemesai bukai nyengkaum Speaker Kunsil Nengeri Datuk Amar Asfia Awang Nasar, Menteri Pengatur Pemansang enggau Rampa Menua Ke-2 Datuk Amar Awang Tengah Ali Hassan, Menteri Pemansang Tanah Tan Sri Datuk Amar Dr James Jemut Masing, Menteri Muda Pengerai Mensia Mayuh Datuk Dr Jerip Susil, presiden SUPP Tan Sri Peter Chin enggau sekretari besai SUPP Senator Dr Sim Kui Hian.
Ba hari kedua Hari Raya (Hari Dua), Astana bisi mega ngatur pengawa Ngelalu Pengabang Hari Raya ungkup mensia mayuh sereta tuai-tuai opis perintah menua tu.
Ba pengawa nya, bala temuai ukai semina bepeluang dijamu tang mega bepeluang begambar enggau Taib, Ragad sereta sida sebilik.
KAMI TETAP TEGAP: Chin (kiba) disempulang Lee (kanan) enggau Sim berandau enggau Taib.