Kitai begunaka bilun datai jampat, ku Alfred Jabu

0

Dikarang Jacqueline David //

Enti perintah besai lengkas nganjung bilun nya kitai muntang agi menih remang ngambika bisi ujan

KUCHING: Perintah Menua Sarawak nengah Majlis Keselamatan Negara (MKN) udah minta bilun kena Menih Remang ari perintah besai ngambi ulih mutarka penusah kemarau ti balat ngujungka sekeda pelilih menua ditu betapi enggau penanggul suntuk ai.

Sapit Kepala Menteri Datuk Patinggi Tan Sri Alfred Jabu madah, peminta bilun nya ngambika bisi dikena menih remang lalu bilun nya patut dianjung jampat ngambika ulih bejalaika pengawa di pelilih Samarahan, Sri Aman, Betong enggau Sarikei.

Jabu madah, bekal ai di Pelilih Menua Betong kelebih agi di Saratok balat suntuk ai.

“Pelilih menua Saratok ke balat betapi penyuntuk ai ari Betong laban bekal ai Lichok udah langkang, tambah nadai jalai deka ngepam ai ari endur nya laban sungai udah langkang laban kemarau.

“Aku udah ngasuh Opis Kereja Raya (JKR) enggau Opis Pengintu Pengelantang Pendiau di Pelilih Menua Betong ngambi ai ari Betong enggau Sarikei lalu nganjung ngagai sitak ke udu nadai ai di genturung pendiau di Saratok, Roban, sitak niti tebing tasik enggau sekeda endur di Pelilih Menua Betong baka di Debak, Spaoh, Beladin, Pusa, Maludam,” ku iya lebuh dirandau pemberita nyerumba pengawa ngelalu pengabang Hari Raya, Sekretari Perintah Menua Sarawak, Tan Sri Datuk Amar Morshidi Ghani di rumah iya di Jalai Bunga Kasturi, Kpg Pinang Jawa ditu, kemari.

Jabu mega madahka, iya enggau Menteri Bekebun Bedandang Besai enggau Komoditi ti mega Kaban Parlimen Betong, Datuk Amar Douglas Uggah Embas enggau Menteri Pemansang Rama ti mega Kaban Parlimen Saratok, Tan Sri William Mawan Ikom ngena ungkup Projek Mit Menua Pesisir (MRP) sida kena melanja ngangkut bekal ai ti dianjung 10 kali pejalai nganjung ai ngagai Pelilih Menua Betong nyengkaum Saratok, Roban enggau Kabong.

“Aku udah berandau enggau Morshidi, iya nya pengawa menih remang deka dipejalai enggau naka pengelengkas,” ku iya.

Maya kemarau taun tu ku iya, enda ngemalat taun 2012 suba.

“Laban angin El Nino dijangka deka datai tang nitihka jangka sereta pengangat ai di tasik, musin kemarau tu enda balat baka ke udah.

“Taja pia, Perintah Menua Sarawak udah besedia napi El Nino tu ke dijangka panjai, lalu kelimpah ari nya, ba aum MKN ti bechairmanka aku empu minggu nyin tadi, kami pan besedia napi pengujan bulan Disember, Januari enggau Februari,” ku Jabu.

Pekara bekait enggau palan pemeresi ai di kaki Wong ku iya, konteriktor ke ngaga palan nya udah minta pemendar nyambung pengawa nya ke dijangka deka tembu dalam urung bulan November tauka Disember taun tu.

Maya penemuai Menteri Pemansang Menua Pesisir enggau Kandang Menua Datuk Seri Shafiee Apdal meresa projek nya dua minggu ke udah, projek nya dijangka laun tembu.

Naka ke diatu ku iya, ba sitak ke betapi enggau penusah nadai ai, tiap-tiap hari JKR nganjung bekutak ai butul mineral enggau dua tangki besai ai 10 kali pejalai dalam sehari.