Dikarang Chris Bishop //
Iya mega enda tau sengapa diubah ketegal deka ngemantupka sekeda pakara, perambuKUCHING: Penetap ke udah dituku dalam Barisan Nasional (BN) patut dibasa sereta enda diubah sengapa ketegal ti deka ngemantup sekeda pekara tauka perambu, ku Presiden Parti Rakyat Sarawak (PRS) Tan Sri Dr James Masing.
Ku iya, penetap ke udah dituku nya patut seruran dipebasa ngambika tiap raban dalam serakup BN berakup, segulai sereta sejalai.
“Nya mih kebuah BN ngelama 40 taun ke udah seruran berakup lalu nya dijapai ketegal kitai ngasika penetap ke udah dituku.
“Kitai enda ngubah ketegal ti deka ngelantangka sekeda pekara tauka meri awak endur sekeda orang diterima dalam serakup,” ku iya.
Iya mansutka jaku tu lebuh dirandau pemberita rambau pengerami ngelalu pengabang ke diatur Kepala Menteri Tan Sri Datuk Amar Adenan Satem nyerumba Hari Raya di Palan Aum Besai Borneo Kuching (BCCK) ditu, kemari.
Masing ke mega Menteri Kanan sereta Menteri Pemansang Tanah madah, iya (PRS) deka seruran ngasika penetap ke udah dituku kenyau BN dipun suba.
Nyaut tanya pemberita sekalika PRS mengkang enda nerima kededua United People Party (UPP) enggau Parti Tenaga Rakyat Sarawak (TERAS) dalam gempung BN Nengeri, Masing madah pemutus nya dilempaika ngagai semua parti dalam gempung.
“Pekara nya patut diputus nengah chara ke ngena lalu enti semua setuju, nya meh maya kitai nerima.
“Aku pechaya sigi bisi sekeda raban deka nulak pinta dua parti baru nya nyereta gempung BN Nengeri kelebih agi SPDP enggau SUPP.
“Lalu enti aku nyadi seiku ari orang dalam SPDP tauka SUPP, aku deka ngasika penetap ke udah dituku serakup BN,” ku iya.
Ngenang kaul ke sama, Masing pechaya pekara nya ulih putar dalam timpuh 2 taun tauka 18 bulan tu sebedau pengawa bepilih nengeri ke deka datai.
Ku iya, ketuai dalam BN ulih tetemuka chara mutarka pekara nya lalu semina nganti maya ke ngena aja.
Iya nambah, enti amat diperunding pekara nya ulih diputar dalam timpuh enam bulan.
“Semina nganti maya pengeran tauka pengingin politik kitai bisi, pekara nya sigi ulih diputar.
“Pekara tu patut diperatika enggau berat lalu aku pechaya kitai ulih ngiga jalai mutar.
“Anang ngira pengelantang seiku aja, kitai patut berundingka pemaik semua,” ku iya.
Entara ketuai bukai ti bisi datai ngulu pengawa ngelalu pengabang rambau pengerami Hari Raya nya kemari, presiden SUPP Tan Sri Peter Chin, pemangku presiden SPDP Datuk Sri Tiong King Sing, presiden TERAS Tan Sri William Mawan, chalun presiden UPP Dato Sri Wong Soon Koh enggau sekeda ketuai bukai.