Dikarang Rengenyan Labang //
KUCHING: Perintah nengeri deka nempa kerejasama enggau orang bepengelandik ari Australia dalam pengawa ngelanggur ‘Masterplan’ dikena ngemansangka 600 ekar pemesai kandang endur baru di Sibu.
Menteri Pemansang Pengawa Berumah, Datuk Amar Abang Johari Tun Openg madah, 600 ekar pemesai nya ila deka dikemajuka ngena pemansang ti kontemporarai tauka moden.
“Kami deka ngemansangka kandang endur baru ti pemesai 600 ekar ngena pemansang ti moden sereta nguna orang bepengelandik (pakar) Australia dalam pengawa ngelanggur Masterplan, ti dipejalaika dalam Langgur Pemansang Malaysia Lumpar Kesebelas (RMK11).
“Aku ngasaika tu sebengkah pemansang kontemporari tauka moden, ke ulih dikembuan raban bansa lebih agi ti teulihka penatai pemisi RM3,000 ke baruh.
“Dalam kandang baru tu (600 ekar) deka bisi disikap tauka disediaka kereban ICT (Information, Communicataion & Technology) ti pemadu baru. Sekula, taman rekreasi, komersial enggau kereban sukan bisi disediaka ungkup raban bansa ke diau ba endur tu,” ku iya seraya madahka kandang endur 600 ekar nya enda jauh ari Kampung Datu di Sibu.
Abang Johari mansutka pekara nya lebuh dikerandau pengarang berita nyerumba nyambut pengerami Hari Raya ba Hari Kedua enggau mensia mayuh di Dewan Bahasa dan Pustaka (DBP) ditu, kemari.
Bejaku baru iya madahka pakar ke sama dikena ngemansangka projek Darul Hana.
“Kitai deka ke pengelandik sida (Australia), laban kitai deka ngetanka asal genturung pendiau seraya ngemeranka chara moden (dalam genturung pendiau),” ku iya ti mega nyadi Menteri Dagang Temuai.
Kelimpah ari nya lebuh dipinta ngenang bekaul enggau Kampung Datu baru di Sibu, iya madahka sebengkah pemansang infrastruktur udah disediaka.
Iya madahka perintah udah nyendiaka urung 120 unit ungkup raban bansa di Sibu lebih agi ke Kampung Datu ke rebak baru enggau lama kandang endur nya.
“Bekaul enggau 120 unit tu, kami meri peluang ngagai peranak Kampung Datu sekalika sida deka ngemansangka rumah nya kediri tauka sida ulih minta bantu ari kami.
“Nambahka nya kami bisi mega ngemansangka rumah ti baru Rumah Mampu Milik ke bisi 33 lot , lalu rumah tu deka nyadi rumah chunto,” ku iya.