PTD patut dikerembai ngagai semua nengeri

0

KUCHING: ‘Program Transformasi Daerah’ (PTD) ti diperambau dikerembaika serata menua berengkah taun 2014, enti chakah sereta bebendar dipejalaika deka meri pangka positif ngagai sistem pelajar.

Presiden Gerempung Pengajar Bumiputera Sarawak (KGBS) Ahmad Malie madah, program nya dikena ngangkatka penyulut sekula seraya ngerapitka seraka entara sekula menua pesisir enggau mengeri.

Iya madah, diatu program nya dipungkal di Sabah enggau Kedah, sereta nyema meri pangka positif endang deka dipejalaika ba nengeri bukai nyengkaum Sarawak.

“Program Transformasi Daerah (PTD) tu dikena ngerapitka seraka penyulut sekula menua pesisir enggau mengeri, tang naka ke diatu bedau ngayanka pemanah program nya laban baru ditumbuh sereta dipejalaika dalam taun tu.

“Taja pia pemendar enggau pengekih deka bejalaika program tu udah bisi laban semua pegawai ba renggat PPD (Opis Pelajar Pelilih Mit Nengeri), pengajar enggau piak sekula udah dipadahka pasal PTD, ngambika nyikap diri ngangkatka tikas kualiti pelajar.

“Enti nitihka strategi enggau perambu sereta bebendar dipejalaika, kami (KGBS) ngasaika PTD tu deka meri pemanah tauka pangka positif dalam pelajar,” ku iya.

Ahmad mansutka pekara nya lebuh dirandau Utusan Borneo bekaul enggau Program Transformasi Daerah, nyerumba ‘Rumah Terbuka Hari Raya’ ke diatur iya di rumah iya di Lorong Burung Lilin ditu, kemari.

Ba taun 2013, program pemungkal (PTD) dipejalaika ba Kedah enggau Sabah ti ngayanka bisi penambah penyulut dalam peresa perintah (UPSR,PMR,SPM), lalu pemadu tinggi dibandingka enggau nengeri bukai di Malaysia

Seraka entara sekula menua pesisir enggau mengeri ba kededua nengeri nya maja mit sereta jauh lebih manah dibanding enggau pukul raya serata menua, lalu penyulut nya meri penegap ngagai opis menteri ngerembaika PTD ngagai serata menua berengkah taun 2014.

Kelimpah ari nya Ahmad ti ngenang Pelan Pembangunan Pendidikan Malaysia (PPPM) 2013-2025, iya madah, gelombang keterubah PPPM opis menteri udah chakah bejalaika program nya.

“Ba gelombang keterubah PPM, KGBS meda opis menteri udah berengkah ngerah sereta bejalaika PPPM.

“Entara ti udah dipejalaika baka SIPartner+ enggau SISC+ ke udah dipejalaika ba semua renggat pelilih menua, bisi diangjung ba PPD sereta sida tu mantu piak sekula enggau  pengajar ngangkatka penyulut pelajar menua,” ku iya seraya madah, KGBS diatu bisi lebih 6,000 iku kaban sereta 14 pampang serata nengeri tu.

Dulu ari nya Ahmad sebilik nerima pengabang ari KGBS sereta CUEPACS enggau ke bukai.