KUCHING: Sitak Kunsil Nengeri (DUN) Sadong Jaya dituntung penanggul suntuk ai lalu ngujungka sida beambika ai ti bisi disadung perintah ngena tangki.
Kaban iya, Aidel Lariwoo madah penanggul suntuk ai tu nyadi kenyau lima hari ke udah berindik ari loji ai beresi Asajaya nyau rangkai ketegal kemarau.
Pekara nya ku iya ngujungka 22 buah kampung dituntung penanggul kurang penatai ai.
“Naka ke diatu, loji ai Asajaya agi nadai insur (agi rangkai) ketegal kemarau ti kelalu panjai,” ku iya lebuh dirandau kemari.
Iya madah munyi nya lebuh dipinta meri penemu bekaul enggau gaya utai ke nyadi diatu sentang penyuntuk ai ba DUN Sadong Jaya.
Nangkan ke nya, iya madah pengawa nyadung ai ngagai orang kampung dipejalaika ngena tangki.
“Opis Kereja Raya (JKR) benung bebendar bejalaika pengawa nyadung ai ngena tangki ba sebelah kampung ke benung suntuk ai,” ku iya.
Pengawa nyadung ai ngagai orang kampung bisi betapi enggau penanggul laban penatai ai enda mayuh ba sitak Muara Tuang.
“Tu ngujungka ai enggai nyadi enda diambi ari Kuching awakka ulih disadung ngagai mensia mayuh,” ku iya.
Sekeda kandang menua di Kuching enggau Saratok bela dituntung penanggul suntuk ai.