KUCHING: Mensia mayuh ba serata nengeri tu dilalau ngambika meresa pengerai diri enggau lengkas ba kelinik tauka sepital ti semak, nyema bisi penanggul ba pengerai.
Direktor Opis Pengerai Nengeri Datu Dr. Zulkifli Jantan dalam penerang berita kemari madahka, kelai penanggul ba pengerai ketegal pengangat gaya hari enggau sebun iya nya pedis pala, batuk, sendat seput, jampat lelak, enggai jenuh, lemi buku tulang, besintak urat enggau bisi asai deka jeluak.
“Baka ke udah ditemu kitai, ba serata menua diatu benung betapi enggau kemarau, angat sereta besebun, lalu tu dipelabaka majak nyadi nyentuk ngagai pun taun 2015 ila.
“Malaysia dipelaba deka nerima penyampau ujan ti kurang dalam timpuh nya kelebih agi ba nengeri kitai Sarawak.
“Gaya hari ti baka tu (kemarau) ulih ngujungka penyampau penyakit majak nambah kelebih agi nuntung raban anak mit, orang nyelai pendiau (OKU), orang tuai enggau sida ti kelalu gemuk tauka obesiti,” ku iya.
Berindik ari nya ku iya, Opis Pengerai Nengeri ngelalau mensia mayuh ngambika nyaga pengerai diri enggau diri sebilik dikena nyeliahka sebarang penyakit kelebih agi maya musin kemarau tu.
Ku iya, mayuh chara dikena nyeliahka penanggul enggau penyakit ari terus ngelekai.
“Utai ke pemadu beguna iya nya anang kurang ngirup ai ninting hari.
“Tentuka dulu ai ke diirup nya udah dipanduk sereta seliahka ari beirupka ai ke ngundan kafein, ai bisa tauka kelalu mayuh gula,” ku iya.
Kelimpah ari nya, mensia mayuh patut nyaga pemeresi diri taja pan nengeri betapi enggau kemarau enggau penanggul suntuk ai.
Berebak enggau tu, mensia mayuh dipinta bela bekelimat lebuh nguna ai.